OMB hmangin cheng vbc. 81 pûk leh a ni; Sorkar kum kal mekah vbc. 981 pûk tawh

Mizoram sorkar chuan March thla tìr lam khan Open Market Borrowing (OMB) hmangin loan cheng vbc. 81 a pûk leh a, hei nen hian sorkar kum kal mek 2023-24 chhungin cheng vbc. 981 a pûk tawh.

Hriat theih chinah financial year 2023-24 chhungin Mizoram sorkarin OMB hmangin April 2023 leh November 2023-ah sum a pûk lo a, a bak thla dang zawngah chuan a puk vek. Sum pûk tam ber ṭum, nikum May thlaah cheng vbc. 250 pûk a ni a; pûk tlem ber ṭum, October 2023-ah cheng vbc. 60 pûk a ni.

Mizoram budget 2024-25 a pharh zawha thuthar theh­darhtute a kawmnaah Finance enkawltu chief minister Lalduh­oma chuan, kum 2023-24 chhung­in OMB hmangin cheng vbc. 1,200 pûk tura ruahman a nih thu a sawi a, "Mahse, sorkarna kan chan tâk avangin hemi zat hi pûk kher kan tum lo. Kan sorkar hnuah ṭum hnih kan pûk tawh a, kumin sorkar kumah ṭum khat kan pûk leh dawn. Cheng vbc. 1,200 kan pûk tling dawn lo," a ti.

Tarlan tawh ṭhin angin, Mizoram sorkarin OMB hmanga sum a pûkna tura tih tur ṭulte chu Reserved Bank of India (RBI)-in a buaipui a; RBI-in OBM hmanga Mizoram sorkarin sum a pûk tur a zawng ṭhin. OMB hmanga sum pûk a nih theih nan RBI-in state sorkar tana sum pûktir thei tur a zawng a, financial institution-te'n an chháng ṭhin a ni.

OMB hmanga sum pûk chu kum khatah a pung nen vawi hnih rulh tur a ni a, kum 10-15 velah sum pûk zawng zawng rulh a ngai a, a punna (interest rate) chu 7-8% vel a ni.