MSCDRC-in Rs 43,48,480 chawi turin New Life Hospital a hriattir

Mizoram State Consumer Dispute Redressal Commission (MSCDRC) chuan New Life Hospital, Chanmari chu damdawi-ina thi saa naute hrin leh a hringtu nu thih chungchangah Rs 43,48,480 chawi turin a ti a, sum chawi tur chu ni 90 chhungin MSCDRC-ah pe turin a hriattir.

J Zosangzuali w/o Lalduhawma, Aizawlin November 13, 2016-a New Life Hospital-a nau a neihnaah, zing lama naute (hmeichhia) thi saa a hrin chungchang leh, J Zosangzuali pawh tlai lam dar 4:30-a a thih ve leh chungchangah a pasal Lalduhawma leh an fapa Malsawmzuala Tlau chu MSCDRC-ah an zualko a ni.

MSCDRC tarlan danin, J Zosangzuali hi nau nei turin November 12, 2016-ah New Life Hospital-ah dah luh a ni a, darkar riat vel nau veina pek a nih hnuah nau a hrin mai theih loh avangin zan dar 9 velah tihtawp a ni.

A tûk November 13, 2016 zing dar 6:30-ah nau veina pek leh a ni a, nau veina pek aṭanga darkar khat hnuah ICU-a dah luh ngai khawpin a chau. J Zosangzuali chuan ICU-a dah luh a nih hnuah naute (hmeichhia) thi sain a hring a, amah pawh November 13, 2016 tlai dar 4:30-ah a thi zui a ni.

J Zosangzuali leh a nau pai lai thihna chungchangah hian, a chhungte chuan New Life Hospital-in an enkawl danah medical negligence (dâwngdawhna) a awma an hriat avangin MSCDRC-ah complaint an thehlut a, New Life Hospital chu Rs 98,45,440 chawi turin an phût.

MSCDRC chuan thubuai hi hun rei tak a ngaihtuah a, thuhretu atan doctor hrang hrang koh an ni. Tun hnai khan thutlukna siamin, New Life Hospital chu Rs 43,48,480 chawi turin a ti a, ni 90 chhungin MSCDRC-ah pe (deposit) turin a hriattir nghal bawk.

New Life Hospital hi tunah chuan a awm tawh lo a; Chawnpui vengah insawnin, Ebenezer Medical Center tih a ni tawh a ni.