Mizoramah HIV/AIDS vei 29,514 hmu tawh

Mizoram State AIDS Control Society (MSACS) chhinchhiah danin, tun dinhmunah Mizoramah HIV vei mi 29,514 hmuh chhuah a ni tawh a, chu'ng zinga 68% chuang hrette chu mipat hmeichhiatna hman aṭanga kai an ni.

MSACS leh Central YMA hnuaia hriselna leh thianghlimna lam ngaihtuahtu Health & Sanitation Sub-Committee chuan nimin khan Mizorama HIV/AIDS darh zel tur vênnaa thawhho dan tur sawihona an buatsaih a; tun dinhmunah Mizoramah HIV vei mi 29,514 an awm tawh thu leh, HIV veite zinga 68% chuangte kai chhan chu mipat hmeichhiatna hman aṭangin a nih thu an tarlang.

MSACS project director Dr Lalthlengliani chuan, HIV/AIDS dona atana duan National AIDS Control Programme (NACP) hman lai thawh ngana (NACP Phase-5)-ah HIV/AIDS darh zel tur vênna ngaih pawimawh lehzual a nih thu a sawi a, "He natna hrik kai zawng zawng aṭanga 95% hmuh chhuah tuma hmalak a ni," a ti.

Dr Lalthlengliani sawi danin, HIV vei hmuh chhuah zat aṭanga 95%-te'n ART (anti retroviral therapy) damdawi la tura ṭan lak leh natna veite zinga 95%-te'n an natna hrik pai zat tihniam tura hnathawhte ngaih pawi­mawh a ni.

Sawihonaah hian CYMA Health & Sanita­tion Committee aṭangin secretary Dr Lalrinawma Hnamte bakah, Dr Van­lal­chama, Dr Joseph Zohming­liana leh Zo­muan­­puia te an tel a; Mizoram chu India rama HIV darh chakna ber a nih avangin HIV vênnaah YMA-in theihtawp chhuaha hmalak an ngaih pawimawh thu an sawi.

HIV darh zel tur vênna atana hmalakna lian tak, kai tamna ber mipat hmeichhiatna hman khawloh leh hmeichhe inzuarte leh, mahni mipatpui kawpte bakah, damdawia inchiu ṭhinte zinga hmalaknaah Aizawl khawpuiah drop-in centre 13 nei tura tih a nih laiin, a taka tihpuitlin theih a nih rih loh dante sawi a ni a; HIV hrik darh zel tur vennaa thawhho dan turte sawiho a ni bawk.