Zirna ṭha kan pek chuan khua leh tui ṭha ber kan chher chhuak dawn - CM

Champhai district chuan nimin khan DC Office tualah kum 25-na, silver jubilee an lawm a; chief minister Lalduhoma'n hman­­puiin, "Kan ṭhalaite hi zirna ṭha ber kan pek chuan khua leh tui ṭha ber kan chher chhuak dawn," a ti.

CM Lalduhoma chuan, ZPM sorkarin zirna ṭha din turin ruahmanna an siam mek tih sawiin, "Ṭhang­thar ṭha zawk din tura tih­mâkmawh hmasa chu zirna ṭha neih a ni a, kan ṭhalaite hi zirna ṭha ber kan pek chuan khua leh tui ṭha ber kan chher chhuak dawn," a ti a; zirna lam sawi apiangin sorkar hmalakna duhkhawp lohna neih a awl tih sorkarin a hria a, zirna siamṭha turin ruahmanna an duan chhoh mek thu a sawi.

Thiamna tak tak nei turin zirlaite an ṭan a ṭul thu sawiin Lalduhoma chuan, "Zirtuin a zir phawt chuan sikul ṭha tak ni lo aṭang pawhin mi hlawhtling leh ṭangkai tak tak an chhuak tam tawh. Kei pawh chief minister PA ni chunga lehkha zir ve hram hram ka ni a, tunlaiah internet aṭangin hriatna hnâr a awlsam hle tawh hnuah pawh central service hi kan tling hlei thei tlat lo a, taimakna leh tumruhna kawngah kan pachhe ta niin a hriat," a ti.

Chief Minister chuan, budget tharah Hand Holding Policy kalpui nan cheng vbc. 200 an dah thu sawiin, "Hei hi a hmahruai mai a la ni. He policy-in a tum ber chu khua leh tui tu pawh, eizawnna khawp theihna leh thiamna nei, hmalakna tur hriate an bána kaia dinchhuahtir a ni," a ti a; a thlawna sem leh a thlawna dawn tumna thinlung tireh a, mahni thawh chhuah ngei hmanga dinchhuah tum turin mipui a chah.

Champhai DC silver jubilee lawmna hi bawrhsap James Lalrinchhana'n a kaihruai a; Chief Minister hian jubilee lungphun leh photo gallery a hawnh a, jubilee souvenir a tlangzarh bawk. Champhai district-a MLA ni mekte pawhin thu an sawi a, tlaiah jubilee ruai ṭheh a ni.

Champhai hi district atan December 12, 1997 khan puan a ni a, March 11, 1998-ah sorkar hriattirna tihchhuah niin, hemi kum vêk April thlaah DC hawn a ni.