Cheng nuai 38.40 tihchingpen vangin CEM hlui nupui thiam loh chantir a ni

Special Judge (Prevention of Corruption Act) Dr HTC Lalrinchhana chuan, cheng nuai 38.40 tihchingpen thubuaiah Chakma Autonomous District Council (CADC) chief executive member hlui Buddha Lila Chakma (L) nupui Sujata Chakma chu nimin khan thiam loh a chantir a, March 18, 2024-ah hrem dan tur a puang dawn.

Special Court thutluknaa tarlan danin, kum 2012 khan 13th Finance Commission chuan CADC Session Hall sakna a tan cheng nuai 300 a ruahman a, Mizoram sorkar chuan cheng nuai 300 aṭangin cheng nuai 232 chu CADC kutah a hlan. CADC sorkar chuan session building sak hna chu cheng nuai 250.63 hmanga thawk turin RV Hluna, Edenthar Veng, Aizawl a thlang a ni.

RV Hluna hian hna a thawk a, sum second instalment a dawn hmain khatih laia CADC CEM Buddha Lila Chakma chuan hna chu contractor RV Hluna hnen aṭangin a chhuhsak a, inremna power of attorney hmangin a nupui Sujata Chakma chu a thawh chhunzawmtir.

Court-a thuhretute thusawi aṭanga tarlan dan chuan, Buddha Lila Chakma hian contractor chu harsatna hrang hrang siam luiin, dan anga a thawh tur bak pawh a thuneihna hmang sualin thawh luihtir a tum ṭhin a; contractor RV Hluna chu Sujata Chakma hnena hna pe lo thei lo dinhmunah a ding a ni.

Buddha Lila Chakma hi a thubuai ngaihtuah zawh hma, October 10, 2023 khan a thi a, chuvang chuan a nupui thubuai chauh ngaihtuah chhunzawm a ni.

ACB-te'n an chhui dan chuan, RV Hluna hnen aṭanga hna an chhuhsak hnu lawkah Sujata Chakma chuan CADC Session Hall sak hna chu a chawlhsan a, cheng nuai 48.60 a la hman thung. Cheng nuai 48.60 aṭanga dik lo taka an sum dawn zata chhut chu cheng nuai 34.66 a ni.

Spcecial Court (PC Act) chuan Sujata Chakma chu thiam loh chantir a nih avangin bail-a a lo chhuah tawhna a titawp nghal a, jail-a dah luh nghal turin thutlukna a siam a ni.