Biometric attendance kalpui ṭan
Mizoram sorkar hmunpui, Secretariat-ah nimin aṭang khan thawktute pisa thlen hun leh haw hun chhinchhiahna atan biometric attendance hman ṭan a ni a, enchhinna anga kalpui rih a ni.
GAD Secretariat Administration Wing chuan March 14, Ningani khan biometric attendance enchhin ṭan a nih tur thu an tarlang a, "Biometric attendance lâkna khawl hmun hrang hranga dah zinga a remchang berah pisa luh leh chhuah apiangin face recognition hmangin attendance dah tur a ni. Face recognition hmanga attendance tih theih lohte tan chauh finger print lâkna hman tur," an ti.
Biometric attendance registration la ti lo emaw, ti tawh, harsatna tâwkte chu phone number 97747 77063-ah inhriattir vat tura chah an ni.
Assembly session neih zawh tâkah chief minister Lalduhoma chuan, biometric attendance chu sorkar pisa zawng zawnga hman tura tih a nih thu sawiin, "Chutihrual chuan, a to tham deuh avangin attendance lakna rintlak a nih chuan thil dang pawh pawm tho a ni," a ti a; School Education department pawhin sikul tan man tláwm zawk hmanrua an hman dawn thu a sawi.