KHAWTHLIR

Vawiinah MP thlan puan beisei

Election Commission of India hotute - chief election commissioner Rajiv Kumar leh election commisioner-te chuan vawiin chawhnu dar 3 hian New Delhi-ah press conference an nei dawn a, Lok Sabha inthlanpui neih hun tur an puan rin a ni. Mizoram Chief Electoral Officer pawhin vawiin tlai dar 5:30 hian IPR Auditorium-ah press conference a nei ve bawk ang.

Thisen pe

Evangelical Church of Maraland KTP, Chakhei bial chuan nimin khan Chakhei-ah Siaha District Hospital tan thisen unit 47 an pe a, petute mipa 44 leh hmeichhia pathum an ni. New Leaf Band, Kolasib pawhin Kolasib District Hospital-ah thisen unit sarih an pe. PYD (NEI), Serchhip Bial chuan March 14, Nilaini khan Serchhip District Hospital tan thisen unit 15 an pe a, petute mipa pakua leh hmeichhia paruk an ni.

Mau ṭiak 9,10,725  phun a ni tawh

Horticulture department chhin­chhiah danin, Mizoram sorkar chuan Mizoram chhungah mau chi hrang hrang ṭiak 9,10,725 a phun tawh. Mau ṭiak 9,10,725 phun aṭang hian 70% vel a dam chhuak a, a puitling anga chhût a ni. Mau chi buaipuina atan Mizoram sorkar chuan cheng nuai 648.16 a sêng ral tawh bawk.

Sorkar chhuang

ZPM UPA Committee chuan chief minister Lalduhoma kaihhruai Mizoram sorkarin Assembly budget session-ah tar pension (Old Age Pension) Rs 100 ni ṭhin Rs 1,000-ah an tisang chu lawmawm an tih thu leh ZPM sorkar an chhuan thu an tarlang a, "Kum upa zawkte tan leh an chhungkaw tan chanchin lawmawm a va ni em. Sorkar tan sum tam tak sènna tur ni mah se, a ngaihna hria in thuneihna an chan chuan a tih dan an hre mai a lo ni," an ti.

Minister-te'n endik

PWD minister Vanlalhlana leh Power & Electricity minister F Rodingliana te chuan nimin khan Hand Holding Policy hnuaia thlai thar dahṭhatna turin Zuangtuia PWD, Commerce & Industries leh PE department hmunhmate an enfiah.

Sangha khawi zir

Mamita Agricultural Technology Management Agency leh Fisheries Development Office chuan Mamitah March 11-14, 2024 chhung khan ṭhalai kut hnathawkte tan sangha khawi dan leh enkawl zui dan inzirtirna an buatsaih, Fish Rearing & Management Training-ah hian Mamit district-a ṭhalai, sangha khawi lama tui kum 18-40 inkar mi 15 an tel a ni.

Ramri tlawh

Hnahthial additional SP Beimosia Lapi chuan March 14, 2024 khan Hnahthial district-a Myanmar ramri hnaih khua Bualpui 'H' a tlawh a, khawtlang hruaitute leh tlawmngai pawl hruaitute thil pawimawh hrang hrang a sawipui. Myanmar raltlante hnena dan loa birth certificate pek chhuah ṭhin leh ruihhlo donaa ṭan lakho dan turte sawiho a ni.