World Consumer Rights Day hman a ni

Nimin kha World Consumer Rights Day a ni a, Mizoram hmun hrang hrangah hman a ni. Aizawlah chuan Economics & Statistics conference hall-ah hman a ni a, Food, Civil Supplies & Consumer Affairs minister B Lalchhanzova'n a hmanpui.

B Lalchhanzova chuan, consumer-te’n tunlaia thiamna sang tak, artificial intelligence (AI) ṭangkai takin an hmang thei dawn tih a sawi a, "Consumer-te dikna chanvo hi mi dang tana dah bik loin, mi tin hian consumer kan nihna kan chian a pawimawh a, kan dikna leh chanvote kan hriat chian a ngai. Nasa taka mimal leh pawl ang pawha consumer-te hamṭhatna ngaih pawimawh deuh deuh a ṭul," a ti.

Consumer Protection Act, 2019-in a phût angin consumer-te thubuai hlabuai rem turin Mizoram pum huap State Consumer Disputes Redressal Commission din a ni tawh tih sawiin Minister chuan, "Sorkar pawhin consumer-te’n an dikna leh chanvo an neih theih nan theihtawp chhuah zel a inhuam," a ti a; ngaihtuahna thar chhuak zelte dawngsawnga pawm thiam turin mipui a chah.

World Consumer Rights Day hmanna hi Mizoram Consumers' Union president Prof. Chawngsailova'n a kaihruai a; National Institute of Technology, Mizorama Ph.D scholar Robert Lalramhlua'n Day thupui, 'Fair and Responsible Artificial Intelligence for Consumers' tih a sawi.

World Consumer Rights Day hi district khawpui hrang hrangah pawh nimin khan hman a ni.