Tumruh leh project nei ṭha an nih chuan eng party nge an nih a pawimawh lo - Chief Minister

Chief minister Lalduhoma chuan March 16, Inrinni khan Zuangtui Industrial Estate-ah FK Toughened Glass Factory, FK Oxygen leh FK Roof a hawng. CM chuan, a kaih­hruai sorkarah mi tumruh leh project nei ṭha an nih phawt chuan eng party nge an nih a pawimawh loh thu a sawi.

Lalduhoma chuan, kutkawih eizawnna buaipuitu (enterpreneur)-te chu ram tan an hlut thu sawiin, "Eng sorkar pawhin enterpreneur ṭha neih an duh. Ṭhalaite'n mi hlawhtling hmasate entawnin, inelna thiang­hlim nei se kan duh. In hmalaknaah puih cheu kan inhuam. Non industrial state tih ṭhin Mizoram hi industrial state nih ve theih kan duh a, kawng pawh a inhawng a ni," a ti.

Sorkarna an chelh hnuah Mizoramin Invest­ment Policy a neih ve tâk thu sawiin Lalduhoma chuan, "Mi tu pawh, mi tumruh in nih a, in project a ṭhat phawt chuan eng party nge in nihin kawng­ro a su dawn lo," a ti a; kutkawih eizawnna lamah theihtawp chhuaha pên chhuak turin ṭhalaite a sáwm.

Chief Minister chuan, F Kapsanga'n industry lama hma a lo lak tawhte chu lawmawm a tih thu sawiin, "Vawiinah a nupui fanaute'n an chhungkaw hmalakna an chhunzawm zel hi a lawmawm. An zarah industry lamah Mizoramin hmasawnna kan hmu ṭhin. Entreprenuer ṭha zarah ramin industry-ah te, service sector lamahte hma kan sawn phah ṭhin," a ti.

Commerce & Industries minister F Rodingliana pawhin thu sawiin, "Mizoramah industry-in ṭhan lam a pan a, eizawnna nghet, hna zahawm a ni. ZPM sorkarin electric bill a tipung dawn lo a, industry tan malsawma a ni," a ti a; industry-te tan kawlphetha hman man subsidise deuh an tum thu leh chumi atana policy ṭha tak an neih thu a sawi.

F Rodingliana chuan, Mizoramah industry policy a neih ve ṭhin thu sawiin, "Mahse, budget head-ah a awm ngai lo. Tunah chuan kan dah tawh a, innghah ngamna a awm. Industry kan neih ṭhat chuan ho mai maia kan hman ṭhinte ṭangkai takah kan hmang thei dawn. Thawn chhuah tham siam chhuah lamah ṭan kan lak ve a ngai," a ti.

Factory pathum hawn inkhawmah hian Assembly speaker Lalbiakzama, deputy speaker Lalfamkima, minister pali - Vanlalhlana, Lalrinpuii, PC Vanlalruata leh Lalnghinglova Hmar, govt. deputy chief whip W Chhuanawma leh sorkar official-tye an tel a ni.