Kan intiamnaah kan din loh chuan mipuiin ZPM sorkar nawntir kher an ba lo - Sapdanga

UDPA minister K Sapdanga chuan ZPM intiamnate chu lo chhinchhiah turin Zoram mipui a chah a, an intiamnaah an din loh chuan mipuiin ZPM sorkar nawntir kher an bat loh thu a sawi.

Mizoram Cleanliness Competition 2023-a LMC chhunga local council fai bera thlan Salem Veng LC hnenah trophy leh Rs 1, 00,000, pahnihna Zohnuai LC hnenah trophy leh Rs 80,000 leh, pathumna College Veng LC hnenah trophy leh Rs 60,000 hlan a ni a; LC dang pathum hnenah consolation prize hlan a ni bawk.

K Sapdanga hian March 15, 2024 khan Lunglei Convention Centre-ah Lunglei Municipal Council (LMC) buatsaih Mizoram Cleanliness Competition 2023-a lawmman dawngte hnena lawmman hlanna hun a hmanpui a; intiamna an ngah thu sawiin, "Lunglei mipui mai ni lo, Zoram mipuiin kan intiamnate kha lo chhinchhiah se, kan thutiamah kan din loh a, mipui tehnaah kan tlin loh chuan term lehah chuan min chawlhtir mai rawh se, tih hi kan dinna a ni," a ti.

'Kan eiru lo ang, dik lo takin thil kan ti lo ang, tlâk huamin hna kan thawk ang, sum hmangin vote kan zawng lo ang,' tih leh thil dangte an tiam thu sawiin K Sapdanga chuan, "Duhkhawp loh sorkar thlan nawn leh hi mipuite'n an ba lo. Term lehah chuan 'Kalphung thar - mipui sorkar' tiin ZPM hi a inzuar tawh dawn lo a, 'Kan hnathawh aṭang hian min teh rawh u' tiin kan inzuar tawh dawn," a ti a; sorkarin hma a laknate ṭawiawm tur leh ṭanrualpuiah mipui a sáwm.

UDPA Minister chuan, ZPM sorkara budget session hmasa berah LMC enkawlna tur budget ṭhahnem tak pek an nih thu sawiin, "LMC councillor-te hi Lunglei khawpui enkawl tura mipuite'n kan thlan tlinte an ni a, eng emaw avangin kum khat dáwn hmanrua nei lo leh hna thawk thei loin an lo awm tawh. Kan councillor-te hi hna thawh châkin za zek zekin an lo awm tawh. Tunah chuan hna thawhna tur hmanrua sorkarin a pek tawh dawn avangin mipuite'n eng ang councillor nge an neih tih an hre ṭan tawh dawn a ni," a ti.

K Sapdanga hian LMC website www.lmclunglei.com a tlangzarh a; khualzahawm Lalzuithanga, LMC chairman pawhin thu sawi.