KHAWTHLIR

Thisen pe

March 16, Inrinni khan YMA, Ramthar Veng Branch, Aizawl chuan Civil Hospital, Aizawl tan thisen unit 105 an pe a, petute mipa 92 leh hmeichhia 13 an ni. KṬP, Dawrpui Vengthar Branch-in Synod Hospital tan unit 35 an pe a, petute mipa 33 leh hmeichhia pahnih an ni. Khawbel Student's Union pawhin Aizawl Civil Hospital blood bank-ah unit 12 an pe a; mimala a thlawna thisen pe mi pariat an awm bawk. ṬKP, Siaha West Bialin Siaha District Hospital tan unit 18 an pe a, petute mipa 14 leh hmeichhia pali an ni.

Heroin man

Assam Rifles leh Zokhawthar police-te chuan March 15, 2024 khan Melbûk bul kawngpuiah heroin gram 37 an man a, Rs 25,90,000 hû a ni. Ruihhlo kawltu Lalremsiami (33) w/o Kaphranga (L), New Champhai leh Saidingpuii (23) w/o Lalbiakdika, Chanmari, Aizawl te an man nghal bawk.

Hnathawh enfiah

Minister of state Lalnghinglova Hmar chuan March 16, Inrinni zingah khan a bial Aizawl West-II chhunga Dawrpui Vengtharah veng chhunga hna thawh ngai leh thawh mek ṭhenkhat a enfiah. Minister hi PWD engineer-te leh Dawrpui Vengthar khawtlang hruaitute’n an ṭawiawm a ni.

Hnatlangpui hawng

PHE department hnuaia Project Management Unit chuan March 16, Inrinni zingah khan West Phaileng bazarah faina hnatlang khuhhawnna an buatsaih a, PHE ambassador Lal-tharzeli'n a hawng. Faina hnatlang hawnnaah hian tlawmngai pawl hrang hrang hruaitu te, khawtlang hruaitute leh Sanitation Committee hruaitute an tel. PHE PMU kaihhruaina hnuaiah Mamit district-a khaw hrang hrangah faina hnatlangpui neih zui a ni ang.

SVEEP inzirtirna

Information and Broadcasting ministry hnuaia Central Bureau of Communication (CBC), Aizawl chuan March 16, Inrinni khan Chawlhhmun High School hall-ah Systematic Voters' Education and Electoral Participation zirhona an buatsaih. CBC Aizawl incharge Lalginlen Lhouvum, Chawlhhmun H/S headmaster Thangrosiama leh Johnson College assistant professor Dr C Lalhmingliana ten thu an sawi a; quiz intihsiakna buatsaih a ni bawk.