Tuikual nu thattua puh man a ni

Nimin chawhma dar 10 vel khan Aizawl New market-a VLH Variety Store neitu V Lalhmingthangi (52) w/o Zothanmawia, Tuikual South chu a dawrah thia hmuh a ni a, amah thattua puh Irene Lallawmzuali (34) w/o Lallungmuana, Ramthar North chu nimin vêk khan police-in an man.

Tualthihna chung­changah hian Home minister K Sapdanga chuan nimin khan Aizawl SP pisa conference hall-ah thuthar thehdarhtute a kâwm. Minister sawi danin, Zothanmawia, Tuikual South chuan a nupui V Lalhmingthangi chu March 16, Inrinni zan khan a haw loh avangin nimin zing khan Aizawl Police Station-ah FIR thehluh a tum a, chutih mek lai chuan an fapain a nu chu a dawr chhungah thiin a hmu a ni.

Thil thleng hi Police leh Forensic lamin bawhzuiin, ngawrh takin an chhui nghal tih sawiin K Sapdanga chuan, "A hmuna thil awm dan leh thil thlenga hriat nei àwm angte thu zawhfiahna aṭangin Lalhmingthangi thattu nia rinhlelh Irene Lallawmzuali, Ramthar North-a chêng mek chu vawiin (17.3.2024) hian Zemabawk Dinthar Venga a ṭhiannu in aṭangin man a ni," a ti.

Home minister K Sapdanga sawi danin, Irene Lallawmzuali hnen aṭangin tualthahna atana a hman ni ngeia lang chemte leh V Lalhmingthangi thil neih nia hriat eng emaw zat man tel a ni bawk. He tualthihna chungchangah hian Aizawl PS-ah tualthah thubuai ziah luh niin, case no. chu 87/24 Dt 17.03.2024 u/s 302/201/380 IPC a ni.

Thu dawn danin, V Lalhmingthangi ruang hi nimin chhun khan Civil Hospital, Aizawlah enfiah a ni a, nizan khan lumen niin, vawiinah vui a ni ang.

Zawhna chhangin Home Minister chuan, Irene-i hian thurualpui a neih leh neih loh leh, dawr bungrua a bo leh bo loh chhui zui mek a la nih thu a sawi.

Vanglaini thu dawn danin, V Lalhmingthangi hi zanah a haw loh avangin nimin zing lam khan a chhungte a dawrah an kal a, dawr a lo inkalh. Dawr kawngka aṭangin thisen chhuak an hmuh avangin tala chhu chhiain an hawng a, thiin an hmu ta a ni.

Home Minister chuan, thil sual tituin thiam loh a chan ngei theih nan theih­tawpa police-te hnu chhuina pui turin mipui a sáwm a, hnu chhuina tiṭhuanawp thei tur thil ti lo turin mi tin a
ngen bawk.