Home Minister-in Home hmunte a tlawh

Home minister K Sapdanga chuan March 16, Inrinni khan Lunglei Municipal Council (LMC) chhunga Home department hnuaia hmunhma hrang hrang a tlawh a; Lunglei District Special Branch (DSB) mi leh sa zinga zu leh ruihhlo manna kawnga thawk ṭha mi panga hnenah chawimawina a hlan.

Home Minister hian 2nd MAP hmunpui Lunglei Lungmual a tlawhnaah 2nd MAP commandant pisa kawta martar-te hriatrengna lungphunah zahna pangpar a dah a, "Police-te hi kawng tinrenga kan hmathehte in ni. Sorkar hrang hrang kan hrawn tawh a, sorkar hmasate'n theitawpin ram siam hna an lo thawk tawh ṭhin. Amaherawhchu, insiamṭhat ngai vek kan ni a, theitawp chhuaha lo thawk tawhte sûlhnu chhuiin, engtin nge a aia ṭha zawka kan thawh ang tiin ram venhimnaah te, civil hnaah te, hmasawnna hnaahte mi tinin tih tur kan nei," a ti.

'Kalphung thar - mipui sorkar' tih chu an auhla a ni tih sawiin K Sapdanga chuan, "Sorkar kal tawhte an sitawm tihna ni loin, kalphung thar zel din hi mihringte kalphung tur leh awm dan tur a ni a, sipaite hi hma hruaitu tur kan ni. 2nd MAP siamṭhat leh thuam ṭhat ngai laite kan sawiho zel ang a, theihtawp kan lo chhuah dawn a ni," a ti a; 2nd MAP-te chu inthununna leh fitness-ah battalion dangte entawn tlak leh hma hruaitu nih tum turin a chah.

Home Minister hian Lunglei DSB mi leh sa zinga zu leh ruihhlo mannaa thawk ṭha mi panga - ASI Zothansanga, head constable P Lalcham-liana, head constable Lilypawrmawii, constable Lalmanthanga leh Lalduhzuala te hnenah chawimawina thuchei leh pawisa a hlan a ni.

2nd MAP commandant Francis Lalnuntluanga Ralte tarlan danin, 2nd MAP hi October 7, 1987-ah din a ni a, Lunglei Luangmualah kum 1989 aṭangin an awm. Lunglei, Hnathial leh Serchhip district-te an vil a, post (sanction strength) 827 a nih laiin, thawktu mi 528 an awm mek a ni.