Eizawnna atana ram nei lote ram hawhtir dan tur ngaihtuah

Land Revenue & Settlement (LRS) minister B Lalchhanzova chuan, eizawnna atana ram nei lote tana ram hawhtir dan tur sorkarin a ngaihtuah thu a sawi.

LRS Minister hian March 16, Inrinni zing khan Bawngklawn Brigade Pig Producers Coope­rative Society-ten eizawnna atana ram an hman mek Brigade Field mawng lama mi a tlawh a, society member 23-te'n lo dawngsawngin, hmalak dan turte an sawiho. Minister sawi danin, ram hi land lease pein kalpui tum a ni a, municipal dan siam bawhchhe lo thei ang ber tura kalpui tum a ni dawn.

B Lalchhanzova chuan, Aizawl khawpuia cheng mi tam takte'n eizawnna hrang hrang kalpui turin ram an nei lo tih sawiin, "Ran vulh te, huan siam te, puantahte leh a dangte kalpui turin ram âwl hman tur a váng hle. Hetiang harsatna sukiang tur hian Urban Livelihood Multipurpose Camp (ULMIC) ruahman turin ngaihtuahna sên mek a ni a, a puitlin ngei ka beisei," a ti.

Aizawla cheng eizawnna tur ram nei si lote'n an mamawh anga an hman hawh theih tur ram âwl la awmte zawn a ni dawn tih sawiin Lalchhanzova chuan, "Ram âwl nei, mi dangte eizawnna atana hawhtir phalte pawh thawhpuiah sawm an ni ang. ULMIC hmunah chuan sorkarin convergence hmangin kawng, electric, tui leh ṭul dangte a ruahman ang," a ti a, eizawnna mamawhte'n ṭangkai taka an hman theih tur thu a sawi.

LRS Minister sawi danin, ULMIC hi mimal ta tur ni loin, zau tinah society din zel a ni ang a, eizawnna mamawhte'n society kaltlangin an hmang ṭangkai thei ang. Hetiang camp din tur hian department mal anga kalpui theih a ni dawn lo a, department hrang hrang, municipality, local council, kohhran, YMA leh a dangte thawhhona tur a ni.