MP inthlana vote thlâk vek turin Aizawl DEO-in mipui a sáwm

Aizawl district election officer (DEO) Nazuk Kumar, bawrhsap chuan nimin khan DC conference hall-ah Lok Sabha inthlanpui awm tura Aizawl district inbuatsaihnate thuthar thehdarhtute a hrilhfiah a; ram puma vote tla zat chawhrual aia sang Mizoramah vote a tlâk theih nan vote thlâk ṭheuh turin mipui a sáwm.

Nazuk Kumar chuan, MP inthlan chu mipuiin ngai pawimawh se a duh thu sawiin, "MP inthlan hmasaah Mizorama vote tla zat chawhrual chu India ram puma vote tla aiin a tlem a, tun ṭumah hi chuan ram puma vote tla zat aia kan hniam loh a ngai. MLA inthlan hnuhnung bera vote thlâk kan tam ang khan MP inthlanah pawh vote nei zawng zawngte vote thlak ṭheuh turin ka sáwm a ni," a ti.

Bawrhsap chuan, Election Expenditure Monitoring hnuaiah kawng hrang hrangin inthlanna dik leh felfai a awm theih nan hmalak a nih dawn thu a sawi a, "Thil dik tâwk lo leh fel lo, dan bawhchhiatna lam in hriat chuan rang takin rawn sawi u la, hma kan la nghal vat zel ang," tiin, thuthar thehdarhtute a chah.

Aizawl DEO tarlan danin, February 8, 2024-a final electoral roll tihchhuahah Aizawl district-ah voter 2,90,058 an awm a, mipa 1,34,843, hmeichhia 1,53,480 leh service voter 1,735 an ni.

Aizawl district-ah polling station 321 a awm a, Assembly constituency tinah hmeichhe hlangin an vil tur polling station pali zel a awm dawn a, a vaiin 48 a awm ang. Rualbanlo (persons with disability/PwD) hlangin an vil tur polling station pakhat siam tum a
ni bawk.

Rualbanlo certificate neite leh kum 85 chung lamte tan postal ballot hmanga mahni in lama vote thlâk (home voting) ruahman a ni a; vote tla a ṭhat theih nan vote tlâk tlem ṭhinna hmunah Systematic Voters’ Education and Electoral Participation (SVEEP) special campaign buatsaih tum a ni.

Inthlanna atana hman tur EVM leh VVPAT endik zawh a ni tawh a, strong room-ah dah a ni. Aizawl district tan EVM ballot unit 514, control unit 523 leh VVPAT 541 a awm a, a ṭul huna hman tur reserve eng emaw zat a awm bawk.

AIZAWL DISTRICT DINHMUN

☑ Voter 2,90,058 an awm; mipa 1,34,843, hmeichhia 1,53,480 leh service voter 1,735.

☑ Voter tamna ber constituency - Aizawl West-I (30,094).

☑ Voter tlemna ber constituency - Tuivawl (17,899).

☑ Voter tamna ber polling station - Zemabawk-VIII (1,483).

☑ Voter tlemna ber polling station - Chhanchhuahna Khawpui (86).

☑ Mipa voter 1,000 zela hmeichhe voter awm zat - 1,138.

☑ Mipa voter aia hmeichhe voter tamna - 18,637.

☑ Kum 18-19 voter (young voter) - 1,0131.

☑ Kum 85 chin chung lam voter - 1,493.

☑ Rualbanlo voter - 778.

☑ Polling station zat - 321 (khawpuiah 257, thingtlangah 64).

☑ Lok Sabha General Election 2019-a polling station zat - 331.

☑ Polling station zat a kiam chhan - Chalfilh leh Ṭawi bialte Saitual district-ah a awm tawh vang.