PC-in MP candidate atan Rita Malsawmi an thlang

People's Conference party chuan April 19, 2024-a Lok Sabha inthlanpuia an party candidate tur chu Rita Malsawmi (49) d/o LT Muana (L), Kolasib Venglai a nih thu nimin khan Kolasib Press Club-ah an puang.

Rita Malsawmi hi November 22, 1975-ah Hortoki khuaah a piang a, tunah Laipuitlangah a khawsa mek. Mizo zinga modelling lam ti hma­sate zinga mi a ni a, Doordarshan Kendra, Aizawlah news corres­pondent hna a thawk tawh a; hla phuah thiam leh zaimi a ni. Joshua Operation-ah president a ni mek a, ZORO Gen.Hqrs-ah secretary a ni mek bawk.

Lok Sabha MP candidate tur puangtu PC president Vanlalruata chuan, an candidate chu MP atan thlan tlin a nih chuan Aizawlah MP office an hawn dawn thu sawiin, "MP zawng zawngin an biala office an neih vekna tur dan siam a nih theih nan hma a la dawn. Hemi avang ringawt pawh hian MP zawng zawngin role model an neih, history bung thar siamtu a ni dawn," a ti.

Rita Malsawmi pawhin thu sawiin, "Mizoram MP mai ni loin, Zo fa zawng zawng leh India ram Kristian zawng zawng tan MP ka ni dawn," a ti a; Mizoram hmasawnna tur, Zo fate himna tur leh Hindutva do tura nasa taka ke a pên theih nan amah vote turin mipui a sáwm.