ZPM hi sorkar laipui thláwp theitu leh dodâl theitu kan ni - Lalduhoma

ZPM hruaitu Lalduhoma, chief minister chuan, sorkar laipuiah zawm bik an neih loh avangin ZPM party chu sorkar laipui thláwp theitu leh dodâl theitu an nih thu leh, Mizoramah contract hna thawh ṭhenkhat chhe tak tak hmuh tur a awm thu a sawi.

Nimina ZPM pisaa in­khawm­ah Lalduhoma chuan, sorkar hmasa hnuaia contract hna thawh chung­chang sawiin, "Hna zawh hun tawh, la zawh loh tam tak a awm. Hna ṭhenkhat sem sawm lutuk vanga hna chhe tak tak hmuh tur a awm nual bawk," a ti.

Lalduhoma chuan, Vaisam kawng siam chhe lutuk chungchang video thehdarh aṭanga thuneitute beng a thleng chu lawmawm a tih thu a sawi a; hna ṭha lote pho chhuak a, thuneitute beng a thlen theih nan sorkar thawhpui zel turin pawl leh mipui a sáwm.

ZPM chu ṭualto party, sorkar laipuia zawm bik nei lo a nih thu sawiin Duhoma chuan, "Tu ma'n kan kut min phuarsak ve dawn lo. A thu azira central sorkar thláwp theitu leh dodal theitu party kan ni a, hei vang hian central sorkar pawhin min ngai pawimawh a, vawiin thleng hian min thawhpui ṭha em em a ni," a ti.

Lalduhoma chuan, Lok Sabha inthlana ZPM candidate tur Richard Vanlalhmangaiha chu chhui chian dâwl, mithiam, Mizo hmeichhe zinga MLA hmasa ber leh Mizo District Council-a chairman hmasa ber fapa a nih thu a sawi a, ZPM candidate vote vek turin Mizoram mipui a sáwm.

Lalduhoma chuan, Mizoramin MP fel tak tak a nei tawh ṭhin rualin, ṭawng lama harsatna nei, Parliament House chhunga khâ chih tlat leh central minister-te dâwr tura harsatna neite an awm tawh ṭhin thu a sawi a, "Chutiang ngaihtuah chuan Pu Richard-a hi MP ṭha tak a nih ka beisei. Budget piah lama central sorkar hnuaia scheme ṭha tak tak hai chhuak thei turin kan ring tâwk a ni," a ti.

Inkhawmah hian minister Lalthansanga pawhin thu sawiin, "ZPM hi Pathian ruat party leh vawiin thlenga Pathianin a hruai kan ni a, 'Party first, me second' titu kan nih a pawimawh. Kan hnam dinchhuahna turin nationalism leh economic self-sufficiency ṭan kawptir thiam a pawimawh hle," a ti a; ram leh hnam intodelh ni tura ṭan lak a hun thu a sawi.