KHAWTHLIR

MZU-in thisen pe

Mizoram University NSS chuan nimin khan MZU campus-ah thisen pek rûnpui an huaihawt a, Civil Hospital, Aizawl tan thisen unit 138 an pe a, petute mipa 108 leh hmeichhia 30 an ni.

Media centre

Election Commission of India thupek angin Mizoram additional chief election officer Dr H Lianzela kaihhruai State Media Centre din a ni. Lok Sabha inthlanpui awm turah media & publicity lam hawi indâwrna, lehkhathawn leh a kaihhnawih thilte chu State Media Centre phone number 0389-2954392, 8731806897 (Whatsapp), 8787622508 leh email mzelectionmedia@gmail.com-ahte thawn/hriattir theih a ni.

BSF medical camp

Border Security Force (BSF) 38th Bn. chuan Civic Action Programme 2023-24 hnuaiah March 16-17, 2024 chhung khan ramri hnaih khua - South Phuldungsei, Mamit district leh Marpara South, Lunglei district-ahte medical camp an buatsaih a, battalion commandant Rakesh Panwar-a'n a hmanpui. Khaw pahnihah hian mi 550 chuang an inentir a, an mamawh ang damdawite pek an ni. Medical camp buatsaih tur hian BSF chuan Phuldungsei damdawi-in leh Marpara damdawi-ina thawkte an thawhpui.

GAD Secretary chawlhtir a ni

Election Commission of India (ECI) chuan nimin khan state hrang hranga officer eng emaw zat chu an hna aṭangin a chawlh lailâwktir a, chu'ng zingah chuan Mizoram GAD secretary Vanlaldina Fanai a tel. Officer chawlhtir dangte chu - Gujarat, Uttar Pradesh, Bihar, Jharkhand, Himachal Pradesh leh Uttarakhand state-a Home Secretary-te leh West Bengal DGP an ni. Vanglaini thu dawn danin, officer-te hi suspend an ni lo a, inthlan zawhah an hna an zawm leh ang.

Sum pai tam loh tur

Mizoram House, Silchar-a Assistant Resident Commissioner chuan hriattirna tichhuakin, Lok Sabha inthlan dawn avangin Silchar luh dawnah Static Surveilance Team-te an duty tih a tarlang a; zin mite chu duty-te laka harsatna an tawh loh nan mi pakhatin sum fai Rs 50,000 aia tam pâi lo turin a chah.

Contact center

Lawngtlai district election officer Cheemala Siva Gopal Reddy chuan Lawngtlai district mipui, Lok Sabha inthlanpui neih tur kaihhnawiha hriat duh nei leh harsatna neite tan District Contact Center number 1950 chu engtik lai pawhin biak theih a nih thu a tarlang. Inthlan chungchang complaint/report duh nei tan cVIGIL application kaltlangin thehluh theih a nih thu leh rualbanlote tan PwD application siam a nih thu a tarlang bawk.

DEO-te'n kâwm

Nimin khan Champhai, Kolasib, Serchhip leh Hnahthialahte district election officer (DEO)-te'n Lok Sabha inthlan kaihhnawihah sorkar hotu te, inthlan kaihhnawiha mawhphurhna neite leh political party aiawhte an ṭhukhawmpui a; inthlanna dik, muanawm leh felfai a awm theih nan leh vote tla a ṭhat theih nana hma lakpuiah an sáwm a ni.