Eirûk vangin court-in kum li táng tur leh Rs 12,00,000 chawi turin hrem
Special Judge (Prevention of Corruption Act) Dr HTC Lalrinchhana chuan Chakma Autonomous District Council (CADC) chief executive member hlui Buddha Lila Chakma (L) nupui Sujata Chakma chu kum li chhung jail-a táng tur leh Rs 12,00,000 chawi turin a hrem.
Special Judge hian Sujata Chakma hi sorkar sum nuai 38.40 tihchingpen thubuaiah March 15, 2024 khan thiam loh a chantir tawh a, nimin khan a hremna a puang. Sujata Chakma hian Rs 12,00,000 a chawi lo a nih chuan kum ruk dang jail-a tàn belh ang.
Court thutluknaa tarlan danin, kum 2012 khan 13th Finance Commission chuan CADC session hall sakna atan cheng nuai 300 a ruahman a, Mizoram sorkar chuan cheng nuai 300 aṭangin nuai 232 chu CADC kutah a hlan. CADC sorkar chuan session building sak hna chu cheng nuai 250.63 hmanga thawk turin RV Hluna, Edenthar Veng, Aizawl a ruat.
RV Hluna hian hna thawk a hman a, sum second instalment pawisa a dawn hma deuhin chutih hun laia CADC-a CEM Buddha Lila Chakma chuan hall sak hna chu contractor RV Hluna chhuhsakin, a nupui Sujata Chakma chu inremna ‘power of attorney’ hmangin a thawh chhunzawmtir a ni.
Court-a thuhretute thusawia a lan danin, Buddha Lila Chakma hian contractor chu harsatna hrang hrang siam luiin, dan anga a thawh tur ang bak pawh a thuneihna hmang sualin thawh luihtir a tum ṭhin a; chuvang chuan contractor chu Sujata Chakma hnena hna pe lo thei lo dinhmunah a ding a ni.
Buddha Lila Chakma chu thubuai ngaihtuah lai, October 10, 2023 khan a thih avangin a thubuai a tawp a, a nupui thubuai chauh Court-in a ngaihtuah chhunzawm.
ACB-in an finfiah dan chuan, Sujata Chakma leh a pasal hian RV Hluna hnen aṭanga CADC session hall sak hna an chhuhsak hnu lawkah hna an chawlhsan nghal a, cheng nuai 48.60 an la hman thung. Cheng nuai 48.60 aṭanga dik lo taka sum an dawn zat chu cheng nuai 34.66 a ni.
Spcecial Court (PC Act) chuan Sujata Chakma chu thiam loh a chantir avangin bail-a a lo chhuah tawhna a sût nghal a, jail-a dah luh nghal turin thutlukna a siam a ni.