Lunglei Luangmual-Vaisam kawng chhui turin ACB-ah FIR thehluh a ni

Centre for Environment and Social Justice (CESJ) working chairman Vanramchhuangi, Chaltlang, Aizawl chuan Lunglei Luangmual leh Vaisam inkar kawng PMGSY hnuaia siam chu a nih dan tur ang ni loa siam leh chhe lutuka ngaiin chhui chian a nih theih nan nimin khan Anti Corruption Bureau (ACB)-ah first information report (FIR) a thehlut.

FIR-ah hian Vanramchhuangi chuan, "Luangmual - Vaisam (Lunglei district) PMGSY kawng laih meka hna chhe lutuka mawhphurtu contractor VRS Construction, Zonuam, Aizawl leh Lunglei Road Division-II, Lungleia hotu lu berte an thil tihsual anga hrem an nih ngei theih nan dan anga hma la turin ka ngen a che," tiin a ziak a; kawng siam chhia thlalakte leh RTI Act tlawhchhana zawhna chhanna dawnte a thil tel a ni.

Vanramchhuangi chuan, March 15, 2024 khan Luangmual-Vaisam PMGSY kawng laih mekah kawng síra tuihâwk luankawr (side drain) chhia video clip a hmuh thu sawiin, "Kawng laih hna thawktu VRS Construction leh a viltu Mizoram PWD, Lunglei Road Division-a a lu ber engineer-te hian mipui pawisa ngeia mipui tam takin an chhawr ṭangkai tur, inkalpawhna kawng laih hna leh vil hna an thawhnaah, mipui zahpahna nei loin duhdah takin kawng an siam a, ram mipui pawi an sawi a ni," a ti.

RTI Act tlawhchhana zawhna PWD Lunglei Road Division II-in an chhàn danin, Luangmual-Vaisam kawng siam hna hi June 10, 2019-ah thawh ṭan a ni a, June 10, 2020-ah zawh tur a nih rualin, an zawh hman loh avangin July 31, 2022 thleng pawhsei a ni tawh. Kawng siam tur thui zawng chu km. 26.700 a ni a, sum ruahman zat chu Rs 45,18,74,346.36 a ni.