MSCW leh MIMA-in tualthihna an dem

Mizoram State Commission for Women (MSCW) leh Mizoram Merchant Association (MIMA) chuan thuchhuah siamin, V Lalhmingthangi w/o Zothanmawia, Tuikual South tualthihna an dem thu leh a kalsan tâk a chhungte an tawrhpui thu an tarlang.

MSCW chuan, V Lalhmingthangi a dawr bungraw dahna kudamah thah a ni chu pawi an tih thu tarlangin, "Pawikhawihtu hmeichhia a ni leh zel hi a pawi lehzual. Kan Home Minister leh kan police-te'n rang taka hma la a, pawihkhawihtu an chhui chhuak nghal hi an chhuanawm kan ti tak zet. Pawikhawihtu hi a phû tâwk hremna pek a nih theih nan chak taka hma la zel turin kan beisei a, tun hnuah hetiang thil hi thleng tawh lo se tih hi kan duh dan a ni," an ti.

MIMA chuan, "Kan sumdawngpui V Lalhmingthangi, March 16, 2024 zana ama sumdawnna, New Market-a an kudama râwng taka thah a ni hi a pawi kan ti tak zet a, kan thinlung a na hle," an ti a; tualthattu nia rin rang taka man chhuah a ni chu lawmawm an tih thu leh tualthattu chu a phû tâwka a na thei ang bera hrem an phût thu an tarlang.