Inthlan kaihhnawiha zawm turte tichhuak

Lok Sabha inthlanpui neih hun tur March 16, 2024 tlaia puan a nih aṭangin ram pumah Model Code of Conduct (MCC) hman nghal a ni a; Mizoramah pawh district hrang hrang hotute'n MCC kaltlangin political party, candidate, sorkar hnathawk leh mipui zawm tur inkaihhruaina an tichhuak.

Election Commission of India (ECI)-in a ruahman dan chuan, Mizorama Lok Sabha inthlan turah hian March 20-ah notification chhuah a ni dawn a, inthlan chuh tum (candidate)-te tan March 27, 2024 thleng hming pek luh theih niin, nomination-te chu March 28-ah endik a ni ang.

Nomination thehlut tawh, inhnûkdâwk duhte tan March 30, Inrinni thleng hun hawn a ni dawn a, parliamentary constituency no. 1 - Mizoramah chuan April 19 (Zirtawpni)-ah vote thlâk a ni ang. Inthlan hi thawh sariha neih a ni dawn a, vote thlâk thawh sarihna chu June 1-ah neih tur a ni. June 4-ah India ram pumah a ruala vote chhiar tur a ni a, MP inthlan kaihhnawih thilte chu June 6, 2024-ah zawh vek tura ruahman a ni.

Inthlan puan a nih aṭangin Model Code of Conduct hman nghal a ni a, India ram puma MP inthlan kaihhnawih hmalakna hrang hrang a zawh thleng hman tur a ni.

BAWRHSAPTE THUCHHUAH TLANGPUI

▶ Phalna nei loa silai chelek leh ken chhuah khap a ni.

▶ Pawl/mimalin phalna la hmasa loin aurinna hman phal a ni lo.

▶ Mipui pun khawmnaah rêng rêng ralthuam (arm) ken phal a ni lo.

▶ Sorkar department-te chu hna thar thawk ṭan/kutthlak lo tura thu pek an ni.

▶ Inthlan puan aṭanga darkar 72 chhungin DEO hnenah hmasawnna hnathawh mek leh la ṭan loh, hmabak awmte kimchang taka thehluh tur.

▶ Sorkar officer-te chu District Election Officer aṭanga phalna la hmasa loin an awmna district khawpui chhuahsan lo tura hriattir an ni.

▶ Central/state sorkar official website-a minister, politician, political party emaw, a kaihhnawih thlalak awmte paih vek tur.

▶ Sorkar lirtheite chu political party, candidate leh inthlan kaihhnawiha duty ni lote tan campaign kaihhnawihah hman khap a ni.