Dan siam peih hun nghak turin hriattir

State Ground Water Authority (SGWA) chuan lei verh hmanga lei chhunga tui lâk chhuah dilna leh enkawl zui zelna tur dan siamṭhat mek chu peih ṭêp a nih tawh avangin, lei verh hmanga lei chhunga tui lak chhuah tumte chu dan siamṭhat peih a nih hma chu hma la rih lo turin a hriattir.

SGWA tarlan danin, Mizoram hmun hrang hrangah enfiahna (survey) awm lo leh phalna nei loin mahni thua lei verh a, lei chhunga tui siak chhuak an awm ṭhin tih hriat a ni a; lei verh tur rêng rêngin thuneitute hnenah phalna lak hmasak tur a ni.

Mizoram Ground Water (Control and Regulation) Act, 2023 hmangin lei verha lei chhunga tui lâk chhuah dilna leh enkawl zui zelna tur dan siamṭhat mek a nih thu tarlangin SGWA chuan, "Peih ṭép a ni a, a dilna dan peih hma hian hma la rih lo turin mipui kan inhriattir a ni. Phalna nei loa lei verhte hi Mizoram Ground Water Act, 2023 Section 29 hmangin hrem theih an ni a, phalna nei loa verhte'n buaina an tâwk a nih pawhin anmahniin mawh an phur ang," an ti.