Sorkar thuneitute'n Zobawkah mimal in panga an ṭhiahsak
National Highway-54 kawngpui zauh mekah in ṭhiah a ngaih avanga zangnadawmna pek tawh, in ṭhiat duh lo Zobawka mi pangate chu nimin khan sorkar thuneitute'n an in an ṭhiahsak.
Sorkar thuchhuah tarlan danin, zangnadawmna pek tawh, in ṭhiah ngai, ṭhiat mai duh lote chu sorkarin ṭhiat tura hriattirna Eviction Notice a pe tawh ṭhin a; an ṭhiah duh loh avangin nimin khan Lunglei DC aiawh assistant settlement officer K Lalhlimpuia, executive magistrate ni bawk kaihhruaiin in ṭhiahsak an ni.
NH-54 kawngpui zauh mekin mimal in a tihchhiat dawn vanga zangnadawmna pek tawh, in la ṭhiat lo leh insaseng duh lote chu sorkar thuneitute'n vawi tam tak in ṭhiata insaseng tura an hriattir hnuah, sorkar thupek an zawm loh avangin March 5, 2024 aṭang khan in ṭhiahsak hna thawh ṭan a ni.
March 5 khan Ṭawipui South khuaah in pakhat ṭhian niin, March 7-ah Ṭhualṭhu khuaah mi palite in ṭhiah leh a ni a; vawiin hian Zobawk leh Dâwn khuaah in pakhat ve ve ṭhiah tum a ni bawk.