END hotute leh kohhran ṭhalai pawlte'n ruihhlo do an sawiho

Mamita Excise & Narcotics assistant commissioner Lalsangzuala Ralte chuan nimin khan a pisaah Mamit district-a kohhran hrang hrang ṭhalai pawl hruaitute kâwmin, ruihhlo do chungchang a sawipui. Ṭhukhawmah hian resolution siam niin, nasa zawka ruihhlo do tura thawhho ni se an ti.

Lalsangzuala Ralte chuan, Mamit district-ah ruihhlo do beihpui thlâk turin kohhran ṭhalai pawl hruaitute puihna an mamawh thu a sawi a; an kohhran/pawl ṭheuhah ruihhlo ṭhat lohzia leh do a ṭulzia uar taka puangzar turin a ngen.

Excise & Narcotics department aṭanga ngenna siamin Lalsangzuala chuan, END-a thawktute tana ṭawngṭai te, ṭhalaite hnena ruihhlo nghawng ṭha lo hriattir te, ruihhlo bâwiha táng mekte chhanchhuahna tura hmalak te, sual laka ṭhalaite dah hran te, ṭhalaite eizawnna nghet nei tura zirtir te, chhungkaw ṭha (Kristian chhungkua) din ngei tura ṭhalaite zirtir leh kohhran aṭanga ṭhalaite inzirtirna chu an beiseina lian ber a nih thu a sawi bawk.