Mizo infiamna hmanga inelna hawng

Mizoram Indigenous Games Association (MIGA) leh Broadcasting Infrastructure & Network Development (BIND) hnuaia Doordarshan Kendra chuan nimin khan Khawzawl Sub-Headquarters YMA Field-ah Mizo hnam infiamna hmanga inelna, 'Mizoram Indigenous Games 2024 (Khawzawl district) an buatsaih a, bawrhsap K Lalrohlua'n a hawng.

Mizoram Indigenous Games 2024 hi district khawpui tinah neih tur a ni a, Mizo hnam infiamnate vawn him leh chawi lâr zelna tura buatsaih a ni. Intihsiak hi Serchhip district-ah buatsaih a ni tawh a, Khawzawl district-a buatsaih zawhah Saitual district-ah buatsaih leh a ni ang.

Khawzawl district tan intihsiakna hi nimin khan hawn a ni a, YMA branch 14 aṭangin infiammi 19 an tel. Mimal inelna - insuknawr, insaihruipawh leh inbuan bakah, a huhoa inelna - inkawibah leh inkepir hmangin an intihsiak a ni.