PUC Infotech Centre hawng

Pachhunga University College-a computer hmunpui tur, PUC Info-tech Centre chu nimin khan MZU finance officer Prof, Vanlalchhawna'n a hawng.

PUC Infotech Centre-ah hian GIS Lab, Language Lab leh Internet Resource Centre-te a awm a, computer 140 dah a ni dawn. GIS Lab hi Geography, Geology leh Environmental Science-in an hman tur a ni a; Language Lab chu English zirlaite leh soft skill course hrang hranga zirlaite hman tur niin, Internet Resource Centre chu zirlai zawng zawngin internet kaltlanga an mamawh lakna tura ruahman a ni.

Infotech Centre siamna atan Rs 71,15,164 hman a ni a; computer base test (CBT) centre atan hman theih a ni dawn bawk a, online exam chi hrang hrang tih theih a ni ang. Information technology leh computer software lam zirna chi hrang hrang atan pawh hman theih tura ruahman a ni bawk.

Centre hawngtu Prof. Vanlalchhawna chuan, PUC chu India ram pum huap pawha hming lang tham a nih avangin tuna higher education kalphung inher danglam mekin a phût anga ṭha ni tura inpuahchah a, zirna-in ṭha tak ni tura ṭan lak a ngaih thu a sawi.

PUC principal Prof. H Lalthanzara chuan, Infotech Centre dinna atan Mizoram University-in sum leh paia ṭanpuina a pek avanga an lawm thu a sawi a ni.