Health & Nutrition Walk huaihawt

Women & Child Development Directorate leh Mizoram University chuan POSHAN Pakh­wada 2024 pualin nimin khan MZU campus-ah Health & Nutrition Walk an huaihawt.

POSHAN Pakhwada Health & Nutrition Walk-a telte chu Social Welfare, Tribal Affairs & Women & Child Development joint secretary Zonunthari'n a vailiam a; thu sawiin, hnam hrisel leh ṭhan ṭha ni turin rilru leh taksa hrisel neih a pawimawh bakah, chaw ṭha chi hrang hrang ei a ṭul thu a sawi.

Health & Nutrition Walk zawhah MZU Audi­torium-ah awareness session hun hman zui a ni a, Women & Child Development deputy director Sailopari'n kaihruaiin, Dr Martin Chawngsailova’n natna inkai chhâwn theih loh (non communicable diseases) leh nunphung hrisel (healthy lifestyle) chungchang a sawifiah.

Poshan Pakhwada (Nutrition Fortnight) hi kum 2018 aṭangin kum tin March thlaah hman ṭhin a ni a, kumin pawh Women & Child Development Directorate bultumin a kaihhnawih sorkar department hrang hrangte nen thawkhoin kawng hrang hrangin hman a ni.

Kuminah hian state, district leh ICDS project hrang hrangah March 11, 2024 khan hman ṭan a ni a, March 22, 2024-ah a khârna hun hman a ni ang.