Ram neituten Bairabi-Sairang rél kawng siam hna thawktute an dang

Bairabi aṭanga Sairang thleng rél kawng siamna atana ram lak neitu ṭhenkhat chuan thuchhuah siamin, zángnadawmna an dawn hma chuan an ramah hna thawh an phal tawh lo a, nimin aṭang khan hnathawktute an dang tih an tarlang.

Ram neitute chuan, "Sihhmui leh Sairang vela Railways, Bairabi-Sairanga additional atana ram lâk tur, kum 2016aṭanga process a, thlaite pawh chhiar vek tawh leh Aizawl DC-in Railway Act, 1989 tlawhchhana award No. 3 of 2019 a siam chu Railways lamin vawiin thlenga compensate pawisa an la pek loh avang leh, pawisa pe si loa ram nasa taka an tihchhiat avangin Government of India-in gazette hmanga declaration ni 21.2.2019-a a siam huam chhunga ram neitute chuan vawiin aṭanga Railways-in compensate an pek hma zawng atan Railways construction hnathawktute'n kan ram chhungah hna an thawh leh an kaltlang phal loin kan dang," an ti.

Kum tam tak chhung an ram an enkawl theih tawh loh thu tarlangin ram neitute chuan, "Thlai thar pawh engmah kan sem thei lo a, compensate min pe si loin, kan ram nasa taka an suasam hi kan phal tawh lo," an ti a; dan ang taka pawisa an dawn veleh an rama kaltlang leh hnathawh an phal tur thu an tarlang.

Hemi chungchanga press release siamtute-ah C Chawnghnuna, Sairang leh N Vanlalnghaka, Sihhmui-te hming tarlan a ni.