Thosi lên hmanga luia nungcha man lo turin hriattir

Lawngtlai district Task Force & Committee for Malaria Elimination chairman Cheemala Siva Gopal Reddy, bawrhsap chuan, damdawia chiah thosi lênte chu sangha leh luia nungchate man/hrai nan hmang lo turin thosi lên dawngtute a hriattir.

Bawrhsap chuan, National Centre for Vector Borne Disease Control-in sikserh (malaria) do nan damdawia chiah thosi lên (long lasting insecticidal net - LLIN) a sem leh dawn tih a tarlang a, "Thosi lên hi damdawi (insecticide)-a chiah sa a nih avangin sangha leh lui vuak emaw, hrai emaw, man tum kan awm ṭhin. Túr (poison) hmanga luia nungchate hrai hi Wildlife Protection Act, 1972 Section 9-in a khap a, dan bawhchhiatna lian tak a ni," a ti.

Cheemala Siva Gopal Reddy hian damdawia chiah thosi lên hmanga luia nungcha man leh hraite chu Rs 25,000 chawi tur leh kum thum chhung jail-a tâng turin hrem theih a nih thu a tarlang.

LLIN thosi lên chu huan hung nan leh in leh a chhehvel hung nan hman loh tur a nih thu tarlang Bawrhsap chuan, "Thosi lên damdawi chiah sa hi thosiin mihring a seh lohna tura sem a ni dawn. LLIN hi kan suk zin lutuk chuan a damdawi sûk fai vek theih a ni a, chuvang chuan, kum khatah vawi hnih/khat vel chauh sûk tur a ni a, sûk zawhah ni sáah pho ro loh tur a ni," a ti.

LLIN thosi lên hi kum nga danah chauh sem ṭhin a nih avangin uluk taka enkawl turin thosi lên dawngtute a ngen bawk.