Pawisa lem neitu kum 6 táng turin hrem

Kolasib Fast Track Court chuan pawisa lem tam tak kawltu Ajmol Hussain Mazarbhurya s/o Attaur Rahman, Hailakandi, Assam chu kum ruk chhung táng tur leh Rs 50,000 chawi turin a hrem.

Kolasib Fast Track Court judge R Vanlalena'n nimina Ajmol Hussain Mazarbhurya hremna tur a tihchhuaha a lan danin, Ajmol Hussain Mazarbhurya hi kum ruk chhung jail-a táng tura tih a nih bakah, Rs 50,000 a chawi loh chuan kum khat dang a tàn belh ang.

Judgement-a tarlan danin, Mizoram Police-a Special Narcotics Police Station, Aizawla thawkte chuan an thudawn bawh­zuiin July 6, 2017 chawhnu dar 2-ah Vairengte Kawng­­thar Vengah Ajniol Hussain Mazar­­bhuya hnen aṭangin July 6, 2017 khan police-in Vaireng­teah pawisa lem nia hriat Rs 2,000 note 431 leh Rs 500 note 1,388 an man a; a vaiin Rs 15,56,000 a ni.

Pawisa lem nia hriat mante chu Forensic Science Laboratory, Aizawl­ah enfiah a nih hnuah pawisa lem a ni tih finfiah a ni.

Ajmol Hussain Mazarbhuya hi IPC Section 489B hnuaiah kum ruk táng tur leh Rs 50,000 chawi tura hrem a ni a, pawisa lemte chu a tak anga hman tum a nih avangin IPC Section 489C hnuaiah kum thum táng tur leh Rs 50,000 chawi tura tih a ni bawk. Thubuai pahniha a tàn hun chhung chu a hranpaa kal loin, hmun khatah dah a ni a, kum ruk chhung táng tura tih a ni.