Politics kaihhnawih advertisement dilna pawm
Additional chief electoral officer Dr H Lianzela, Media Cell nodal officer ni bawk hoin nimin khan State Media Centre-ah State Level Certification Committee (SLCC) chuan Lok Sabha inthlanpui awm tur kaihhnawih political advertisement pre-certification dilna lut chungchang an sawiho.
Ṭhutkhawmah hian political advertisement pre-certification dilnate chu Election Commission of India-in dan leh hrai a zamte zawm a nih leh nih loh endik a ni a; dan pêla thil tih a awm loh avangin thurâwn tlem siamin an pawm a ni.
POLITICAL ADVERTISEMENT
▶ Electronic media kaltlanga political advertisement chhuah tur neite'n ECI-in a din Media Certification and Monitoring Committee hnenah chhuah phalna an dil hmasak a ngai.
▶ Electronic media hian social media pawh a huam.
▶ TV channel/cable network, SMS/voice message, cinema hall, radio & private FM channel, vantlang hmuna audio-visual display, internet leh social media website-a political advertisement tihchhuah turah thuneitute aṭangin phalna lak hmasak tur.
▶ Mimal account/blog/website/social media platform hrang hranga thuchah, thlalak dah, comment, video etc. a politics kaihhnawih tarlante chu political advertisement-ah chhiar tel a ni lo. Political party/candidate-in an chhuah chhàwn pawhin political advertisement-ah chhiar a ni lo a, pre-certification pawh tih a ngai lo a, Model Code of Conduct bawhchhiatna erawh a awm tur a ni lo.
▶ Candidate hming leh hamṭhatna tur advertisement atan district MCMC hnenah chhuah phalna dil hmasak tur.
▶ Party leh pawl state headquarters a awmte tan state MCMC-ah dilna thlen tur a ni.
▶ Candidate/party-te tan chhuah hun tur thlen hma ni thumah dilna theh luh hman a ngai a, mimal/pawl tan erawh chhuah hun tur thlen hma ni sarihah dilna thehluh hman tur.
▶ Dilnate chu ni hnih chhunga ngaihtuah zawh hman tur a ni.
▶ Chanchinbu (print media) kaltlanga chhuah turte tan erawh vote thlak ni leh a hma chiah ni atan pre-certification tih tur a ni.
▶ Candidate remtihna a ni em tih finfiah tur a ni a, a remtihna ni loa advertisement chhuahtu (publisher) chu IPC Section 171H hmanga hrem theih a ni.