AR leh Police-in bomb leh heroin man

Mizoram Police leh Assam Rifles mi leh sate chuan tun hnai khan bomb hmanrua eng emaw zat, heroin tam tham tak leh ram dang aṭanga dan loa lâk luh beer leh thil dangte an man.

Police leh AR mi leh sate hian March 18, 2024 khan Zokhawtharah bomb hmanrua - gelatin chhang (neogel) 110 (kg. 14.084) leh a kép (detonator) 110 an man a; a neitua puh Biakrema (29) s/o Lalbiakzawna (L) leh Ramṭhazuali (28) w/o Biakrema, Ṭiau Khawmawi, Myanmar mi ve ve nia inchhálte an man nghal.

March 18 vek khan Tata Yodha pick-up MZ-02 B-9791 hmanga Myanmar aṭanga Zokhawthara phurh thlen heroin hawng 198 (kg. 2.393) an man a, lirthei khalhtu B Liansanga (45) s/o Lalkamlova, Lunglei Chanmari nia inchhál leh R Malsawmthara (35) s/o R Malsawma (L), Tuipui, Champhai district nia inchhálte pawh an man. Heroin an man hi Rs 71,79,000 hù a ni.

Bomb hmanrua leh heroin kawltu an man mi palite lakah Zokhawthar Police Station-ah thubuai ziah luh a ni.

Hetih lai hian, Assam Rifles thuchhuah chuan Mizoram Police-te nen ṭang dunin heroin kg. 2.393 man a nih thu leh heroin chu inter­national market-ah cheng vbc. 16.75 hù a nih thu a tarlang a; New Hruaikawnah ram dang aṭanga dan loa lak luh kuhva rah kg. 320, cheng nuai 12.37 hû leh ram dang meizial leh beer eng emaw zat man a nih thu an tarlang bawk.