LADC Caretaker-in dept. hotute a kâwm

Governor Dr Hari Babu Kambhampati-a'n Lai Autonomous District Council (LADC) sorkar enkawl lailâwk (caretaker) tura a ruat Lawngtlai bawrhsap Cheemala Siva Gopal Reddy chuan tun hnai khan LADC hnuaia department hotute chu Chief Executive Member conference hall-ah a kâwm.

Cheemala Siva Gopal Reddy chuan, LADC officer-te nen thawhhona ṭha tak neih a duh thu sawiin, "Thawhhona ṭha tak hnuaia hmalaknate'n mipui hnen a thlen a ṭul," a ti a; Lok Sabha inthlan awm turah theihtawp chhuaha ṭanhopuiah a sáwm.

Hna ṭha taka an thawh chuan Lawngtlai district hming a ṭhat tur thu sawiin Bawrhsap chuan, "Mipuiin a zár an zo dawn. District chhung tan chauh ni lo, hmun dang aṭang pawha tlawh châkawm khawpa kan district dinhmun siam a ṭul," a ti.

LADC Caretaker chuan, state sorkar leh LADC sorkarin thawh dunna ṭha tak a neih zui zel a beisei tih a sawi a; LADC-ah executive committee awm loh avanga harsatna leh file pending an neihte a theih chin chinah chinfelpui a tum thu a sawi.

LADC CEM V Zirsanga'n CEM aṭanga bànna a thehluh hnuah LADC-ah hian sorkarna siam an awm lo a, chuvang chuan, Governor-in March 13, 2024 khan thla ruk chhunga LADC caretaker atan Lawngtlai DC a ruat a ni.