ZMC-ah post graduate course hawn a nih theih nan hma la turin CM ngen

Science Teachers Association Mizoram (STAM) hruaitute chuan nimin khan chief minister Lalduhoma a pisaah an hmu a, Zoram Medical College (ZMC)-ah post graduate course hawn a nih theih nan hma la turin an ngen.

STAM hruaitute chuan Chief Minister hnenah science lam kaihhnawih thil chi hrang hrang an thlen a; ZMC-a post graduate course hawn a nih theih nan hma la tura an ngen chungchangah CM Lalduhoma chuan, National Medical Commission (NMC) pawmpuina (full recognition) ZMC-in a hmuh veleh post graduate zirna hawn theih a nih tur thu a lo hrilh tih STAM chuan an tarlang.

Directorate of Science, Technology and Innovation chu department puitlinga hlang kai turin STAM hruaitute chuan Chief Minister an ngen a; Chief Minister chuan, department puitlinga hlàn kai theih a nih chiah loh pawhin chak zawka hma la thei tura tihlen ṭul a tih thu a lo hrilh.

STAM hruaitute chuan National Institute of Technology, Mizoram chungchang pawh CM an sawipui a; NIT chu sorkar laipuiin zirna-in ṭha bik tura a duan, Institute of National Importance hiala a puan a nih thu leh India ramah NIT 31 chauh a awm thu an sawi a; NIT, Mizoram hmasawnna tura an mutàn ber - forest clearance tihfel a pawimawh thu sawiin, tihfel a nih thuai theih nan hma la turin CM an ngen bawk.