DC/DEO-in chanchinbumite a ngen

Champhai district election officer James Lalrinchhana, bawrhsap chuan nimin

khan DC conference hall-ah Champhai district-a chanchinbumite kâwm a, Lok Sabha MP inthlan atana inpuahchahna, hmachhawp leh pawimawh dangte hrilhfiahin, sorkar thupek chhuah leh hriattirnate mipui hnenah ṭhahnemngai taka puang turin a ngen.

James Lalrinchhana chuan, Champhai district-ah inthlanna muanawm, felfai, langtlang leh entawn tlak tak neih a nih tawh ṭhin tih sawiin, "Vote thlak leh election kaihhnawih hriat tur pawimawh te, mobile application ṭangkai tak tak te, Model Code of Conduct, sorkar thupek chhuah leh hriattirnate mipui hnena ṭhahnemngai taka puangzar zel turin ka sàwm che u," a ti a; DEO pisaah tlangnêl taka lêng lut tam tur leh hriat duh an neihte zawt hreh lo turin a chah a, a ṭul dan ang zelin press meet buatsaih tum a nih thu a sawi.

Champhai SP Vineet Kumar pawhin dan leh thupek kenkawh kawnga hmalakna leh ruahmannate a sawifiah a, inthlannaah a bikin Law & Order ngaih pawimawh a nih thu sawiin, dan loa thil tihte uluk taka vên a nih tur thu a sawi a ni.

CHAMPHAI DISTRICT DINHMUN

▶ Assembly constituency pathum - Champhai North, Champhai South leh East Tuipui a awm.

▶ Polling station 84 a awm a, kalpawh leh biakpawh harsa a awm lo.

▶ Voter 57,454 an awm a, mipa 28,018 leh hmeichhia 29,436 an ni.

▶ Mipa voter aia hmeichhe voter tam zawkna 1,418 a ni.

▶ Polling party-te pawh vote thlak hma ni (P-1)-ah chhuak vek thei tura beisei an ni.

▶ Inthlana duty turin Champhai district police bakah, hmun dang aṭangin state police an thleng tawh.

▶ CAPF eng emaw zat an awm mek a, thlen belh leh tura beisei a ni.

▶ National Voters Day pualin high school leh higher secondary school tan lemziak leh essay inziahsiak buatsaih a ni.

▶ Bank hrang hrangte'n voter education leh voter registration an kalpui mek.

▶ Champhai district tan EVM ballot unit 138, control unit 151 leh VVPAT 145 dah a ni.