Zángnadawmna la tawhte in ṭhiat leh

NH-54 kawngpui zauh mekin a sut dawn avanga in ṭhiah ngai, zangnadawmna pek tawh zinga Zobawk leh Dâwn khuaa in pahnih chu nimin khan sorkar thunei­tute'n an ṭhiahpui a; March 19 khan Zobawkah in panga leh Siaha district-ah in paruk ṭhiahsak an lo ni tawh bawk.

Lunglei bawrhsap aiawh assistant settlement officer K Lalhlimpuia, executive magistrate ni bawk leh sorkar thuneitu dangte'n nimin khan Zobawk leh Dâwn khuaa in ṭhiah ngaite an endik a, in la ṭhiat lote chu ṭhiahsak turin an inring nghal bawk.

Khaw pahnihah hian chhungkaw pakhat ve vete chuan sorkar thupek angin an in an lo ṭhiat mek a, sorkar thuneitute'n an ṭhiahpui nghal a ni.

Zobawkah hian March 19, Thawhlehni khan in panga chu sorkar thuneitute'n khâwl hmangin an lo ṭhiahsak tawh a; Tuipang leh Theiri khuaa in paruk chu Siaha DC thupekin sorkar thuneitute'n an ṭhiahsak bawk.

Siaha district chhunga NH-54 kawngpuiin paltlang khua, Kawlchaw leh Tuipang inkar laih meka zangnadawmna dawng tawh, an in ṭhiat duh lo chhungkaw parukte in ṭhiahnaah hian Siaha sub-divisional magistrate R Lalnunkimi leh executive magistrate J Lalhmahruaia te kaihhruaiin hma lak a ni a; Theiri leh Tuipang khuaa in paruk chu excavator hmangin ṭhiah a ni.

In ṭhiah tâk neitute chu sorkar thuneitute'n in ṭhiat tura hriattirna, eviction notice vawi nga lai an pek tawh hnuah pawh an ṭhiah duh loh avangin sorkarin a ṭhiahsak ta niin sorkar thuchhuah chuan a tarlang.

Lunglei district bikah chuan thupek zâwm lote in March 5, 2024 aṭang khan ṭhiahsak hna thawh ṭan a ni a; March 5 khan Ṭawipui South khuaah in pakhat ṭhiah niin, March 7-ah Ṭhualṭhu khuaah mi palite in ṭhiah leh a ni.