KHAWTHLIR

MADC session

Mara Autonomous District Council (MADC) budget session chu nimin khan ṭan a ni a, ni thum a awh dawn. MADC nominate member pathumte chu nimin khan House-ah lawm luh an ni a; chief executive member M Laikaw chuan kum 2024-25 atana MADC budget ruahman cheng nuai 21,736.21 a pharh a, naktukah sawiho a ni ang.

GAD Secretary

Mizoram sorkar chuan Election Commission of India (ECI) pawmpuinain General Administration department (GAD) secretary atan R Lalramnghaka, IAS a ruat a, a department enkawl mek PWD nen a enkawl kawp dawn a ni.

Silai tung turin ti

Lok Sabha inthlanpui neih turah inthlanna muanawm leh felfai a awm theih nan nimin khan Lawngtlai district magistrate Cheemala Siva Gopal Reddy chuan Lawngtlai district-ah phalna nei loa silai ken chhuah leh hman khapna thupek a tichhuak. DC chuan, "Vasei Police Station huam chhungah critical polling station a awm avangin Vasei PS huam chhunga silai nei zawng zawngte'n March 22, 2024 ral hmain an silaite Vasei PS-ah an tung tur a ni," a ti.

Vawk hri a lêng

Champhai district-a Vanzau khuaah tun hnai khan vawk eng emaw zat a thi a; nimin khan vawk pûl hri, African Swine Fever (ASF) vanga thi an ni tih finfiah a ni. Vanzau khua hi thu leh awm hma chu vawk hri lênna hmun, infected area-ah puan nghal a ni. Vanzau khua aṭang hian vawk lâk chhuah leh hmun dang aṭanga vawk lak luh phal a ni lo a, vawk thite chu paih mai loin, chinai nen leiah thûk taka phûm tur a ni. Vawk talh leh vawk sa zawrh khap a ni bawk.

Ei siam dan zir

Mizoram University-a Tourism and Hospitality Management depart­ment leh Yuva Tourism Club chuan nimin khan MZU-ah ei leh in buatsaih dan zir duhte tan Food Carving Workshop an buatsaih. Zirhonaah hian zirlai an 40 tel a, dawnfawh, fanghma, apple leh tomato hmanga food carving siam dan leh carving knife leh cutter hman dante an inzirtir a ni.