World Down Syndrome Day

Nimin kha World Down Syndrome Day a ni a, Mizoram Down Syndrome Association (MDSA) buatsaihin Aizawlah hman a nih bakah, khawpui dang ṭhenkhatah pawh hman a ni.

World Down Syn­drome Day puain Vanapa Hall kawt aṭanga Aijal Club Park thleng pualin kawngzawh huai­hawt a ni a, Persons with Disabili­ties (PwD) commissioner Vanlaldiki'n a vailiam. MSDA finance secretary ZR Ṭhafala'n Youtube channel a tlangzarh bawk.

Lal Thanhawla Auditorium-ah hun hman chhunzawm a ni a, intih­hlimna hrang hrang buatsaih a ni. Spastic Society of Mizoram chairman Neihtluangi chuan, tun hnaiah Mizoram hmun hrang hrangah rualbanlote enkawlna leh nu leh pate inhlawm khawmna pawl (parent association) a awm ta nual chu thla­muan­thlak a tih thu a sawi a, "Heng pawlte hi pheikhai rual takin kal zel ila, kan naute enkawlna kawngah hma kan sawn zel ka beisei," a ti.

Sorkar hnathawk zingah fa rualbanlo nei an awm nual thu sawiin Neihtluangi chuan, "Kan naute hi enkawl nasat ngaih hun lai a awm a, hetiangah hian sorkar hian an nu leh pate transfer & posting-ah hriatthiamna nei se ka duh. Enkawl an ngaih zual lai bik hian institution awm ṭhatnaah awm thei se, hei hian hmasawnna kawngah kan naute a pui nasa dawn a ni," a ti. Kohhran leh tlawmngai pawlte chu an hnuaia thawk zinga rualbanlo fa neite dinhmun hrethiam ṭhin turin a ngen bawk.

World Down Syndrome Day hi Kolasib-ah pawh SIRDPR leh District Legal Services Authority buatsaihin SIRD conference hall-ah hman a ni a; chief judicial magistrate Cacy Malsawmtluangi Ralte, SIRDPR principal ZR Ṭhafala leh IPRO Hmingthanzuala ten an hmanpui.

Cacy Malsawmtluangi Ralte chuan, "India khua leh tui kan nih angin chhan hrang hrang vangin kan danglam deuh a nih pawhin, Indian Constitution chuan kan himna tur leh kan hmasawnna turin dikna chanvo min pe ṭheuh a ni," a ti.

ZR Ṭhafala chuan, down syndrome vanga harsatna tâwk chhungkuate a ṭul huna an inṭanpui tawn a pawimawh thu sawiin, "Harsatna lian tak anga lang pawh a huhoa hmachhawn a nih chuan hun hlimawm leh hriat reng tlakah a siam theih," a ti. C Vanlalnunhlima'n down syndrome naupangte enkawlnaa hriat tur pawimawhte a sawi bawk.

DOWN SYNDROME

▶ Mihring hian timûr (cell) tinah chromosome inkawp (pair) 23, a vaiin 46 a awm ṭheuh a, pair 23-a pair 21-naah a belhna (extra) a awm tel ṭhin a, chuvang chuan down syndrome a awm phah ṭhin a ni.

▶ Chromosome extra awm belhna chu pair 21-na a nih avangin pahnih ni ve tawh loa pathum a nih tâk avangin '21 trisomy' an ti.

▶ Chromosome awm belhna avangin rilru leh pianphung ṭhan chhohnaah danglamna a thleng ṭhin.

▶ Mizoramah down syndrome an awm thar ve zel a, mi tam takin an nihphung an hrethiam lo a, an nu leh pa leh chhungkuate ngei pawhin an hrethiam lo fo.

▶ Down syndrome fa nei, MDSA-a inziak lut duh leh hriat duh nei tan phone no. 9612618361 leh 9862049228-ah biak theih a ni.