Saphu káwr kaihhnawihah mi pahnih jail-a tàntir an ni

March 5, 2024 zing dar 4 vela Vairengte Forest Range leh Excise & Narcotics mite ṭang dunin saphu káwr an man kaihhnawihah mi pahnih man belh an ni a, March 19, Thawhlehni khan Kolasib District Jail-ah dah luh an ni.

March 5 khan Daniala (29) s/o Ranjit, Cachar, Assam khalh maxicab (Sumo) ML-10 B-6858 aṭangin saphu káwr kg. 98 man a ni. Daniala hian Shillong leh Aizawl inkar tlân ṭhin a nih thu te, a thil phurhte chu Happy Valley, Shillong-a maxicab counter aṭanga a phurh thu leh, counter nghaktute'n vawksa rêp tia sawiin Aizawla maxicab counter-a dah tura an thawn a nih thu a sawi.

EFCC department chuan chhui zuiin, saphu káwr mana inhnamhnawih nia hriat Lalzuithangi (41) s/o Ramchhanthanga, Champhai leh Vanlalzawni (42) w/o R Lalbeiseia, Zemabawk, Aizawl nia inchhálte chu an man a, March 19 khan jail-ah dah an ni.

Kolasib district forest officer Margaret Lalramchhani tarlan danin, Lalzuithangi chu Wildlife Crime Control Bureau pawhin hun eng emaw chen aṭanga an lo chhui tawh a ni a, a zawmpui sa pêl mi (poacher) aṭanga inhnamhnawihte pawh an man kim thawkhat tawh.

Mizoram aṭangin Myanmar-ah a zawmpui chhui zui a ni a, Lalzuithangi chu finfiahna ṭha tâwk nena man tuma an veh lai a nih thu sawiin Kolasib DFO chuan, "Kan thubuai hi remchangah lain an rawn tel ve a, magistrate-te pawh an hmu. Guwahati Jail-a táng mek Rindiki Teronpi, Assam nen sakei vun leh ruh leh saphu káwr hmanga sumdawngin an thawk dun tawh ṭhin," a ti.

Lalzuithangi leh Vanlalzawni te chu March 14, 2024 khan Shillong-ah EFCC Kolasib Range Officer leh Vairengtea EFCC thawktute bakah, Meghalaya Forest department-te ṭangho chuan an man a, March 16 khan Kolasib thlenpui an ni. Forest custody-ah darkar 96 kawl an ni a, thu zawhfiah an nih hnuah court thu angin jail-ah dah an ni ta a ni.