KHAWTHLIR

Thisen pe

Aizawl College NSS leh Red Ribbon Club-te chuan nimin khan an college campus-ah thisen pek an huaihawt a, Civil Hospital, Aizawl tan thisen unit 105 an pe a, petute mipa 91 leh hmeichhia 14 an ni. PYD Siaha West Bial pawhin nimin khan Siaha District Hospital tan thisen unit 24 an pe a, petute mipa 18 leh hmeichhia paruk an ni.

MP candidate turte

April 19, 2024-a Mizoram Lok Sabha MP tur thlanna neih turah political party pathumin an candidate tur an puang tawh. MP candidate tur hi ZPM chuan puang hmasa berin, Richard Vanlalhmangaiha, Venghlui a ni a; PC party candidate tur chu Rita Malsawmi, Kolasib Venglai niin, Congress party candidate tur chu Lalbiakzama, Model Veng a ni. MNF party chuan vawiin hian an candidate tur an puang ve leh ang.

Khâmah tla hlum

Zase Solo (22) s/o Marahrothie, Siaha chu Bawngkawna 407 truck stand bul khâmah a tla hlum. Zase Solo hi March 19, 2024 khan a chen mekna Hunthar Veng aṭanga a chhuak chu a awmna chin hriat a ni lo a, amah zawngtute'n a scooty an hmuhna Bawngkawna 407 truck stand thlang lamah an zawng a, nimin chawhma lam khan khâm mawngah hmuh niin, chawhnu dar 3:30 velah lak chhuah a ni.

Fraser's Clinic

Synod Hospital péng pakhat, Dr Fraser's Clinic, Mission Veng chu chei ṭhat leh thuam ṭhat a ni a, nimin khan Synod moderator Rev. R Vanlalnghaka'n Pathian hnenah a hlan thar. Fraser's Clinic thuam ṭhat hna hi October 30, 2023 khan ṭan niin, February 17, 2024 khan zawh a ni a, Rs 29,75,000 sên a ni. Pathian hnena hlanna inkhawm hi Synod Hospital director Dr Lalṭhakima'n a kaihruai.

PYD Day

Nimin kha Pentecostal Youth Department (NEI) din champha, PYD Day vawi 55-na a ni a, PYD dinna kohhran hrang hrangah a remchan dan anga lawm a ni. PYD Day pual hian NEI General PYD president Rev. C Lalthantluanga'n thuchhah a tichhuak a, PYD member-te chu mi dangte tana malsawmna ni thei tura inbuatsaih turin a chah.

Forests Day hmang

Nimin kha International Day of Forests a ni a, Lunglei Forest Division leh Lunglei College NSS ṭang dun chuan Lunglei College-ah an hmang. Inkhawm hi Lunglei College NSS programme officer Benjamin L Chhangte-in a kaihruai a, Lunglei district forest officer PC Lalchhandama'n ramngaw leh nungchate pawimawhna zirlaite a zirtir a, quiz buatsaih a ni bawk.

Mobile bookshop

Synod Bookroom chuan thingtlang khaw kilkhawr zawka mite'n Synod Bookroom an chhawr theihna turin thingtlanga kal chilha lehkhabu zawrhna, Mobile Bookshop an kalpui ṭan a, March 18, 2024 khan an chhuak. Mobile bookshop hi March 22, 2024 thleng awh tur niin, truck pathum hmangin lehkhabu an phur chhuak a; Tuichangral tlangdung, Tuipuiral tlangdung leh Sialkal tlangdunga khaw 31 tuam an tum a ni.