Lok Sabha inthlana Congress candidate tur Lalbiakzama

Mizoram Pradesh Congress Committee (MPCC) chuan April 19, 2024-a Mizoram Lok Sabha inthlana Congress party candidate atan Lalbiakzama, MPS (Rtd) an ruat.

Congress party candidate puanna inkhawm hi nimin khan Congress Bhavan-ah buatsaih a ni a, MPCC president Lal Thanzara'n Lok Sabha inthlana an candidate tur chu Lalbiakzama, Model Veng, Aizawl a nih thu a puang a ni.

Lalbiakzama hi March 1, 1960 khan Venghlui, Aizawlah a piang a, kum 1988-ah Mizoram Police Service a zawm a, Mizoram hmun hrang hrangah police hna a thawh bakah, kum 1998 khan UN peacekeeping force atan thlan niin, Bosnia ramah a kal a, kum 2002 tawp lamah UN peacekeeping force-ah awm lehin, Kosovo-ah a kal leh bawk.

Congress MP candi-date tur Lalbiakzama hi Lawngtlai, Serchhip leh Traffic (Aizawl)-ah SP a ni tawh a, kum 2012-ah Home department-ah joint secretary-in a awm ṭan a, Home department-ah hian a pension thlenga awmin, Home secretary a nih laiin a pension. MPS Association-ah ṭum thum president a ni a; kum 2023 khan Congress party a zawm a ni.

Lalbiakzama hi Mizoram buai avangin Silchar-ah a seilian a, English leh Hindi thiam nâl tak a nih thu MPCC thu­chhuah chuan a tarlang.