Social media-ah fimkhur turin chah

Siaha District Legal Services Autority (DLSA) chuan tun hnai khan Industrial Training Institute (ITI), Siahaah zirlaite pualin dan zirhona Legal Awareness Campaign an buatsaih a; advocate J Lalnunsangi'n cyber crime chungchang zirtirin, social media hmang sual an tam avangin fimkhur turin a chah.

J Lalnunsangi chuan, tunlaiah mi tinin social media an hmang nasa tawh tih a sawi a, "Mi tam takin social media an hmang sual nasa em em a, fimkhur tura ṭan lâk a ṭul tawh tak zet. Internet hi thil ṭangkai tak ni mah se, a ṭangkai lo zawnga hmanna a tam hle a, hei hian mipui thinlung a hruai kâwi ṭhin," a ti.

Cyber crime-ah Mizoram pawh a lut thûk tawh hle tih sawiin J Lalnunsangi chuan, "Chhungkua leh khawtlangah chhiatna lian zawk a thlen loh nan uluk leh fimkhur zawka social media hman a ṭul a, inbumna, rûkrûk leh thil dang ṭha lo tam takin min chiah mek. A hmangtute hian fimkhur taka social media leh internet site hrang hrangte kan hman a hun tawh hle a ni," a ti. Zirhonaah hian zawhna leh chhanna hun hman nghal a ni.