Poetry bu ṭha ber 'Thingthlavar'

Mizo Poetry Society (MPS) leh Pachhunga University College-a Mizo department chuan kum 2023 chhunga Mizo kutchhuak poetry bu chhuak zinga ṭha ber atana thlan 'Thingthlavar' tih an thlang a, a ziaktu Nununa Renthlei hnenah nimin khan Mizo Poetry of the Year book award an hlan.

PUC Mizo department leh MPS hian nimin khan IPR Auditorium-ah World Poetry Day an hmang a, Poetry Workshop an buatsaih nghal a, Art & Culture director Carol VLMS Dawngliani'n a hmanpui. He hunah hian 'Thingthlavar' tih ziaktu Nununa Renthlei hnenah Mizo Poetry of the Year book award an hlan a ni.

Carol VLMS Dawngliani chuan, Mizo zingah poetry a ṭhang nasa tih sawiin, Mizoram Publication Board-ah poetry bu chhuahsak tura dil an tam ṭhin thu a sawi a, "Thu leh hla ziaktute chu kan ziah theih loh ziaktute an ni," tiin, poetry lama hmasawn zel turin kal khawmte a chah.

World Poetry Day hmannaah hian poetry chungchang zirhona buatsaih nghal a ni a; Mizoram University-a assistant professor Lalsangzuala resource person a ni.