MLA-in ran chaw chìnna hmun a tlawh

Adviser to CM (Technical) H Ginzalala chuan March 20, Nilaini khan Lengte rama IMCS Nursery Farm-ah ran chaw ṭha tia hriat super napier grass fodder chìn punna hmun leh ran chaw sâwngbâwlna hmun a tlawh.

H Ginzalala chuan, super napier grass fodder chu ran chaw ṭha leh hrisel a nih thu sawiin, "Ran vulhtute tan awlsam taka chîn pun mai theih leh kháwl hautak lo tak hmanga her sawm a, ran chawa hman mai theih a ni a, Mizoram tan thil ṭha tak leh ran vulhtute tana hmasawnna ropui tak a nih ka beisei," a ti.

Super napier chu bâwng, kèl, vawk leh ár tan chaw ṭha a nih mai bakah, state páwn aṭanga chemical leh thil dang pawlh sa to tak taka lei reng ai chuan a ṭhat zawk thu sawiin Ginzalala chuan, "Ka bial Champhai North constituency-a ran vulhtute tan ruahmanna bul ṭan pawh ka duh hle a ni," a ti a; hralh suma sâwngbâwl theih a nih bawk avangin uluk zawka mithiamte ráwn chunga hmalak thuai an tum thu a sawi.