International Forests Day hmang

Environment, Forests & Climate Change department leh Serchhip College-a Botany department leh Eco-Club-te chuan nimin khan Serchhip College HD Rosanga Multipurpose Hall-ah International Day of Forests pualin seminar an buatsaih a, IPVM national awardee Rongura Hrahsel, MFS (Rtd)-in a hmanpui.

International Forests Day hmannaah hian Serchhip College zirlaite leh zirtirtu te, Thenzawl Forest Division-a thawkte leh New Serchhip leh Chhiahtlanga Village Forest Development Committee aiawhte an tel a; ramngaw leh nungcha humhalh kawnga hmalak dan tur leh a pawimawhnate an sawiho.

Rongura Hrahsel chuan, Mizoram leilung hausakna hlu ber chu leilung leh a chhunga awmte an nih thu sawiin, "Kan ram ro hlute hi duat nachang kan hriat loh avangin kan tuar mek. Mizoram pumah tui harsatna kan tâwk chho a, kan ramngaw neih sate humhalh bakah, ramngaw siam belhna lamah ṭan kan lak thar a pawimawhzia kan hriat a ṭul," a ti.