MHIP-ah vote thlâk pawimawhna inzirtir

Mizo Hmeichhe Insuihkhawm Pawl (MHIP) Sub-Hqrs, Serchhip chuan nimin khan Serchhip Auditorium-ah inkhawmpui vawi 12-na an hmang. Serchhip MHIP Sub-Hqrs silver jubilee lawmna leh Systematic Voters’ Education and Electoral Participation (SVEEP) hnuaiah vote thlak chungchang zirhona hun hman nghal a ni.

Serchhip MHIP inkhawmpui, silver jubilee lawmna leh vote thlak tura inzirtirna hun hmanpuitu Serchhip IPRO Lalnunmawii, SVEEP nodal officer ni bawk chuan, Serchhip district-a MHIP branch tinte chu Lok Sabha inthlan awm turah an khua/veng ṭheuhah an member-puite leh mi dangte vote thlak pawimawhzia uar taka zirtir turin a chah.

Lalnunmawii chuan, Serchhip district chu lehkhathiam tamna leh Mizoram district zingah inthlana vote tlâk ṭhatna ber a nih ṭhin thu sawiin, kum 2023-a Assembly inthlanpuiah pawh Serchhip MHIP leh District Election Office thawhhona avangin an district-a khaw tinah hmeichhe voter-te phûr taka cho chhuah an nih thu a sawi. SVEEP hnuaia ‘Lok Sabha inthlanpuia vote thlak ngei tura intiamkamna’ signature campaign-ah pawh hming ziak vek turin MHIP member-te a sáwm a ni.