Kawng metre 750 siam turah Metre 402 chiah siam a ni

11th December, 2020

Saihapui-V leh Phainuam inkár kawng siamna atan cheng nuai 16 pek chhuah a ni tawh a, cheng nuai 16 hmang chuan kawng metre 750-a thui siam tur a nih laiin, metre 402 chiah siam a ni.Bilkhawthlir BDO-in Kolasib-a thuthar thehdarhtute zawhna a chhan danin, Phainuam leh Saihapui-V inkar kawng metre 400 siamna atan MGNREGS 2019-2020 material component aṭangin Rs. 9,00,000 pek chhuah a ni. Lung (boulder) phah chungah cement hmangin PCC flooring tih tur a ni a, party worker-te hnen aṭangin mi pakhatin a lei sak.

Kawng siam tawh chin chu a sei zawng leh a chhah zawng bakah, a zauh zawng thlengin a nih tur ang a tlin loh nasat avangin BDO office chuan sum pek belh tawh loin metre 200 dang siam belh leh turin an hriattir a; chuvang chuan Rs. 9,00,000 hmangin metre 400-a thui siam tur a ni ta a ni.

Kawng siam tawh chu Kolasib-a thuthar thehdarhtute'n nimin khan measuring tape hmangin an teh chhuak vek a; MGNREGS material components sum Rs. 9,00,000 hmanga thawh thui záwng chu metre 241 a ni. Thawh tur zat metre 400 chu metre 159-in a tling lo.

Kawng endika tehtu Kolasib-a thuthar thehdarhtute hnen aṭanga Vanglaini thu dawn danin, kawng siamna atan MGNREGS sum bakah, Rural Development minister Lalruatkima'n RD department aṭangin Rs. 5,00,000 a pe a, bialtu MLA Lalrinsanga Ralte-in MLA fund aṭangin Rs. 2,00,000 a pe bawk.

RD Minister sum pek hmangin PCC flooring metre 129-a thui contract-a thawh a ni a; RD department lam chuan metre 250-a thui siam tur a nih thu an sawi thung. Metre 121-in a tling lo a, siam tur zatve chuang hret chauh siam a ni.

Bialtu MLA sum pek Rs. 2,00,000 hmangin MNF party worker-te'n hna an thawk bawk a, kawng chu metre 100-a thui, metre 3-a zaua siam tur a ni. Thuthar thehdarhtute chuan, kawng chu metre 32-a thui chiah siam a ni a, siam chin tur metre 68-a a tlin loh bakah, a zau zawng pawh a tling lo tih an finfiah.

Saihapui-V leh Phainuam inkar kawng siamna atana MGNREGS sum Rs. 9,00,000, RD Minister pek Rs. 5,00,000 leh bialtu MLA aṭanga pek Rs. 2,00,000-te chu a vaiin Rs. 16,00,000 a ni a; siam tura tih thui zawng belhkhawm chu metre 750 a ni. Chutih laiin, kawng chu metre 402 chiah siam a ni a, metre 348-in a tling lo a; a zau zawng tura bituk aia zîmin siam a ni bawk.