Mizoram pawna Zohnahthlakte Sorkarah an innghat ve lo : CM

Chief minister Lal Thanhawla chuan, Mizoram pawna Zohnahthlakte nunah Mizorama chengte'n entawn tur tam tak an neia a hriat thu sawiin, "Sorkarah an innghat ve lo," a ti.

Chief Minister hian nimin khan Congress Bhavan-ah thu sawiin, tun hnaia Myanmar rama an zin chanchin a sawi. Lal Thanhawla chuan Myanmar-a Mizote chuan sorkar an nghenchhan loh bakah sorkar lak aṭangin ṭanpuina an beisei lo tih sawiin, "Sorkar lakah thil an beisei lo hrim hrim a ni," a ti a, Mizoram chengte'n state pawna Mizote hnen aṭangin entawn tur an ngah thu a sawi.

Sorkara an innghat lo chungin Myanmar-a Mizote chu an changtlung hle tih sawiin CM Hawla chuan, "An kea din an tum a, mahni thawhchhuah ngei ei an tum tlat a ni. Mizoramah chuan sorkar tihsak kan nghak tawp zel. Tun ṭuma kan han zin pawh hi kan lakah beiseina engmah an nei loa, engmah tihsak tura phut pawh min nei lo," a ti.

Lal Thanhawla sawi danin, Myanmar-a Mizote chu an khawtlang nun an nuam a, ṭhalaite'n upa zawkte awl an tum hram hram ṭhin. An rilru chhung rilah an hlim a, khawtlang hruaitute an zahthiam hle. Vantlang hmunhma leh kawngte pawh anmahniin an siamṭha mai ṭhin a ni.

CM chuan Myanmar-a Mizote hlim chhan chu kuttling loa sum la lut loa, ei leh bara an intodelh vang nia a hriat thu sawiin, "Mizo-ramah chuan kuttling loa sum lalut an tam avangin kan hlim ve lo emaw ni ka ti ṭhin. Mizoram chhunga zinkual hi nuam ka ti a, mahse ka huphurh chhan pakhat chu 'Enge ka lo dil ang aw' tih ngaihtuahna a tam ṭhin hi a ni," a ti.

Zoram pawna Zofate'n Mizoram chu an Jerusalem ang tak tak an ngai tih amah ngeiin a hmuh chian thu sawiin Lal Thanhawla chuan, "Zohnahthlak hmun hrang hrang a mite'n Mizoram hi an iptepui banna tlaka an ngaih zel theihna atan kan rilru kan her rem a ṭul," a ti a, Mizoram chengte chu inpui nghaktu ber an ni tih hria a, Zohnahthlakte tana zau taka an rilru hawng turin a chah.

Myanmar rama Chief Minister ṭawiawmtu parliamentary secretary Joseph Lalhimpuia chuan, "Lal Thanhawla'n Myanmar a tlawh hi Zohnahthlakte chuan an thlamuanpui hle. Myanmar sorkarin Zohnahthlakte an hmuh dan pawh a dan phah bakah ngaihsaktu an nei tih an hriat phah thu min hrilh a ni," a ti.

Joseph Lalhimpuia chuan Myanmar sorkarin Zohnahthlakte chu hnam hrang hrang 54 ah an ṭhen sawm tih sawiin,"Hetianga an ṭhensawm avang hian inenhranna deuhte pawh a awm hman a ni," a ti a, Chief Minister zin chuan Zohnahthlakte inunauna a tuh ngheh thu a sawi.