KHAWTHLIR

Synod-in nuai 1 hlan

Mizoram Synod chuan Central YMA hnuaia ruihhlo do pawl supply reduction service (SRS) tan cheng nuai khat a hlan. Pawisa hi Central YMA office-ah Synod hotuten an hlan a ni.

Hun pawtsei

Governor chuan Sinlung Hills Development Council (SHDC) term chu June 1, 2016 aṭanga May 31, 2017 thleng a pawtsei, SHDC chairman leh member-te term pawh hemi hun chhung atan hian pawhsei a ni.

Thisen pe

Lunglei Civil Hospital tan JB College, Lunglei chuan nimin khan thisen unit 60 an pe a, a petute mipa 36 leh hmeichhia 24 an ni. Pukpui bial PYD pawhin unit 28 an pe a, a petute mipa 18 leh hmeichhia 10 an ni.

Tawngtai khawmpui

Salvation Army India Eastern Territory, kum 100 tlin lawmna neih tura prayer sub-committee chuan nimin aṭang Aizawl Bazar Corp-ah
ṭawngṭai khawmpui an ṭan a, April 17 thleng a awh ang.

Hnathawh enfiah

Fisheries minister Dr. BD Chakma chuan, nimin khan Thenzawla Fishery dept. hmalaknate tlawhin, an hnathawh mekte a enfiah a, harsatna awmte sutkian dan tur thawktute a sawipui. Thenzawlah hian cheng nuai 169 sengin hmalak mek a ni.

Jail tangte pe

Central Jail superintendent hnen aṭanga thudawn danin, nimin khan mi pakhat (hming thup) chuan Myanmar-a democracy a awm tak avanga a lawmna atan Central Jail tangte ruai ṭhehna atan Rs. 25,000 a pe.

In chhia

Nimin zinga thli leh ruah leh rial tlain West Phaileng leh a chhehvel-ah in engemawzat a tichhia. West Phailengah chuan in 170 vel a chhia a, 40 chu luah zui tlak a ni lo. Khawhnaiah in 27 chhiain, 10 a luah tlak loa, Tuirumah in 33 chhiain pahnih a luah tlak lo.

Tla hlum

Remthangpuia (17) s/o Bisa, Saiha chu April 14, 2016 zing dar 9:30 vel khan thingthupui kung aṭangin a tla a, a hmunah a thi nghal nia thu dawn a ni.